සිරියාවේ අයුද ගබඩාවකට ඊශ්‍රායල් ගුවන් ප්‍රහාරයක්

සිරියාවේ ඩමස්කස් නුවර ආයුද ගබඩාවක් වෙත ඊශ්‍රායල් ගුවන් ප්‍රහාරයක් එල්ල වූ බව සිරියානු හමුදාව පවසයි.

මෙම ප්‍රහාරයෙන් ආයුද ගබඩාවේ සිටි සිරියානු හමුදා සාමජිකයන් තිදෙනෙකු තුවාල ලබා ඇති බවත්, එල්ල කෙරුණු බොහෝ මිසයිල ප්‍රහාර ප්‍රතිප්‍රහාරවලින් වළක්වා ගැනීමට හැකි වූ බවත් වැඩිදුරටත් ඔවුන් සඳහන් කරයි.

කෙසේ වෙතත්, මෙම ප්‍රහාරය දියත් කළ බව ඊශ්‍රායලය තවම තහවුරු කර නැත. නමුත්, සිරියාවෙන් පැමිණෙන මිසයිල ප්‍රහාර වැළැක්වීම සඳහා තම මිසයිල ප්‍රතිප්‍රහාර පද්ධතිය ක්‍රියාත්මක කර තැබූ බව පමණක් ඊශ්‍රායලය පවසා තිබේ.

එමෙන්ම, මෙහිදී ඊශ්‍රායලය වෙත කිසිදු මිසයිල ප්‍රහාරයකින් හානි සිදුවූ බවක්ද වාර්තා නොවෙයි.

විශාල පිපිරුම් හඬ සමග මිසයිල ප්‍රහාර එල්ල වන ආකාරය දැක්වෙන වීඩියෝ දර්ශන කිහිපයක්ද සිරියානු ආරක්ෂක අංශ විසින් මුදාහැර තිබුණි.