මුම්බායි ගොඩනැගිල්ලක් කඩා වැටී පිරිසක් සිරවෙති

මුම්බායි නගරයට ආසන්නයේ පිහිටි තෙමහල් ගොඩනැගිල්ලක් අද පාන්දර කඩා වැටී ඇති අතර, එම අවස්ථාවේදී ගොඩනැගිල්ලේ සිටි බොහෝ දෙනෙකු නින්දේ පසුවී ඇත.

මෙම අනතුරින් අවම වශයෙන් පුද්ගලයන් 8 දෙනෙකු මියගොස් ඇති බව ප්‍රාදේශීය වාර්තා පවසන අතර, තවත් 20 ත් 25 ත් අතර සංඛ්‍යාවක් ගොඩනැගිල්ල තුළ සිරවී සිටින බව ජාතික ආපදා ප්‍රතිචාර බලකායේ ප්‍රධානී සත්‍ය ප්‍රධාන් පවසයි.

හදිසි සහන සේවකයින් 40 කට වැඩි පිරිසක් එම ස්ථානයට පැමිණ ඇති අතර ඔවුන් මුදාගැනීමේ සේවා සිදුකරන බවද වාර්තා වෙයි.

දිවිගලවාගත් අය සෙවීම සඳහා පොලිස් නිල සුනඛයන්ද යොදගෙන ඇති අතර, මෙය අනතුරු දායක ගොඩනැගිල්ලක් ලෙස නම් කර තිබූ එකක් බවද සඳහන් වෙයි.