පිලිපීනයේ මරාගෙන මැරෙන ප්‍රහාර 2ක් - 10ක් ජීවිතක්ෂයට

දකුණු පිලිපීන නගරයක් වන ජොලෝ නගරයට එල්ල වූ මරාගෙන මැරෙන බෝම්බකරුවෙකු විසින් සිදුකරන ලදැයි කියන පිපිරීම් දෙකකින් අවම වශයෙන් පුද්ගලයින් 10 දෙනෙකු මියගොස් තවත් කිහිප දෙනෙකු තුවාල ලබා තිබේ.

පිලිපීන රතු කුරුස ප්‍රධානී රිචඩ් ගෝර්ඩන් පැවසුවේ සඳුදා සිදුවූ පිපිරීම රටේ දකුණු දිග පළාතෙන් එකක් වන සූලූ අගනුවරදී ඇති වූ බවයි.

පුපුරණ ද්‍රව්‍ය සහිත යතුරුපැදියක් හමුදා ට්‍රක් රථයක් ආසන්නයේදී පිපිරුම සිදුකරගෙන ඇති අතර, ජොලෝ හි රතු කුරුස කාර්යාලය පිහිටා ඇත්තේ පිපිරුම සිදු වූ ස්ථානය අසලදීය.

පළමු පිපිරීමෙන් සොල්දාදුවන් පස් දෙනෙකු සහ සිවිල් වැසියන් සිව් දෙනෙකු මිය ගියහ.

බලධාරීන් ප්‍රදේශයේ ආරක්ෂාව තරකරද්දී සිදුවූ දෙවැනි මරාගෙන මැරෙන බෝම්බකරුවෙකු විසින් සිදුකරන ලද පිපිරීමකින් එක් අයෙකු මිය ගිය බව මේජර් ජෙනරාල් කොලෙටෝ වින්ලුවාන් පැවසීය.

මෙම ප්‍රහාර දෙකෙන් අවම වශයෙන් රජයේ හමුදා 24 ක් තුවාල ලබා ඇති අතර, ප්‍රහාරයේ වගකීම මෙතෙක් කිසිවෙකු විසින් භාරගෙන නොමැත.