භූමිබෝල් රජුට අපහාස කළ කතක් ප්‍රසිද්ධියේ සමාව ගනී

අභාවප්‍රාප්ත භූමිබෝල් අදුල්යාදේජ් රජුට අපහාස වන ආකාරයෙන් අන්තර්ජාලය තුළ අදහස් ප්‍රකාශ කළ තායිලන්ත කාන්තාවක් පොලිස් අත්අඩංගුවට ගැනීමෙන් පසුව රජුගේ ඡායාරූපය ඉදිරියේ වැඳ ප්‍රසිද්ධියේ සමාව ගැනීමට සලස්වා තිබුණි.

එරට සංචාරක ක්ෂේත්‍රයේ ප්‍රකට දූපතක් වූ කෝහ් සාමූයි හිදී මෙම සිදුවීම සිදුව ඇති අතර, ඇයට මේ ආකාරයෙන් ප්‍රසිද්ධියේ සමාව ගැන්වීමට සලස්වන විට විශාල පිරිසක් පොලීසිය ඉදිරිපිට රැස්ව සිටි බවද විදෙස් වාර්තා පවසයි.

වසර 70ක කාලයක් තායිලන්තයේ රාජ්‍යත්වය දරා පසුගිය බ්‍රහස්පතින්දා අභාවප්‍රාප්ත වූ භූමිබෝල් රජු එරට ජනතාවගේ හදවත දිනාගත් චරිතයකි. මේ නිසාම, රජුට එරෙහිව අදහස් ප්‍රකාශ කරන්නන් ඉතා අල්ප වන අතර, එවැනි අදහස් ප්‍රකාශ කිරීමක් කලාතුරකින් තිබුණද, ඊට එරෙහිව ජනතාව නැගී සිටින ආකාරයද දැකිය හැකිය.

මෙසේ අත්අඩංගුවට පත් කාන්තාව 43 හැවිරිදි උමාපෝර්න් සරාසාත් ලෙස හඳුනාගෙන ඇත. ඇය කුඩා ව්‍යාපාරයක් පවත්වාගෙන ගිය කාන්තාවක් බවත්, ඇය අන්තර්ජාලය තුළ රජුට අපහාස කිරීම මෙසේ දඬුවම් ලැබීමට හේතුව බවත් පොලීසිය පැවසීය.

එහිදී, දිස්ත්‍රික් පොලිස් ප්‍රධානියා මෙම අවස්ථාවේ රැස්ව සිටි විශාල පිරිස අමතමින් පවසා සිටියේ, "අපට හැකි උපරිම අයුරින් මේ සිදුවීමට අවශ්‍ය පියවර ගනු ලැබුවා. ඔබේ හැඟීම් මට තේරුම් ගැනීමට පුළුවන්. ඔබ දහස් ගණනින් මේ ස්ථානයේ රැස්ව සිටින්නේ රජුට ඇති ආදරය නිසයි. කණස්සලු වෙන්න එපා. මම දිව්රා කියනවා" යනුවෙනි.