කැනේඩියානු ජාතික ගීයෙන් කාන්තාවන්ට නියෝජනයක්

කැනේඩියානු ජාතික ගීයේ පුරුෂයන්ට මෙන්ම ස්ත්‍රීන්ටද ඇති අයිතිය සම කිරීම සඳහා එහි වචනයක් ඉවත් කර අලුත් වචනයක් ඒ වෙනුවට භාවිත කිරීම සඳහා එරට සෙනට් මණ්ඩලය අනුමැතිය ලබාදී තිබේ.

විශේෂ පනතක් ලෙසින් එරට පාර්ලිමේන්තුවට ඉදිරිපත් වූ මෙම ජාතික ගීයේ වචනය වෙනස් කිරීම, සෙනට් මණ්ඩලයේ අනුමැතියෙන් පසුව අග්‍ර ආණ්ඩුකාරවරයා විසින් රාජකීය අධිමතිය යොදමින් එය නීතියක් බවට පත්කළ යුතුව තිබේ.

මෙහිදී ජාතික ගියේ වෙනස්කම සිදුව ඇත්තේ "in all thy sons command" යන්නෙයි පුතුන් (sons) යන වචනය වෙනුවට අපි (us) යන්න යොදා "in all of us command" ලෙස වෙනස් කිරීමෙනි.

2010 වසරේදී මෙම වෙනස්කම කිරීමට පාර්ලිමේන්තුව උත්සාහ කළද එවර පාර්ලිමේන්තුවේ බහුතර බලයක් හිමිව තිබූ කන්සර්වේටිව් පක්ෂය ඊට අනුමැතිය ලබා දී නොතිබුණි.