ලොව දිනන්න ලංකාවෙන් යන සචිනි

ලෝකයේ නිල වශයෙන් පැවැත්වෙන එකම හා විශාලතම ප්‍රාසාංගික කලා තරගාවලිය වන World Championship of Performing Arts තරගාවලිය සඳහා ලංකාවෙන් ප්‍රථම වරට නියෝජනය කිරීමට තමාට හැකිවූ බව ජනප්‍රිය රංගන ශිල්පිනි සචිනි අයේන්ද්‍රා ප්‍රකාශ කළාය.

එම තරගාවලිය පිළිබඳ මාධ්‍ය දැනුවත් කිරීමේ හමුවක් පසුගියදා කොළඹ ජැයික් හිල්ටන් හෝටලයේදී පැවැති අතර එම අවස්ථාවේදි ඇය මේ පිළිබඳව සඳහන් කළාය.

“මෙම තරගාවලිය සඳහා ලෝකයේ සෑම රටකටම සභාගි විය හැකියි. මෙවර එය පැවැත්වෙන්නේ විසිවැනි වරට. මෙවර එය ඇමෙරිකාවේ ලොස් ඇන්ජලීස් නුවර ලොන් බ්ච් ප්‍රදේශයේ පැවැත්වීමට නියමිත අතර, එය අංශ හතරකින් සමන්විතයි. ඒ රංගනය, නර්තනය, ගායනය හා නිරූපණය යන අංශයි. මම සහභාගී වන්නේ රංගනය සඳහා. මට රංගනය පිළිබඳ වසර දොළහක පළපුරුද්දක් තියෙනවා. ඒවා ප්‍රයෝජනයට ගෙන ලංකාවට කීර්තියක් අත් කරදීම තමයි මගේ බලාපොරොත්තුව.

වෙනත් රටවල්වලින් මෙම තරගාවලිය සඳහා කණ්ඩායම් වශයෙන් සභාගි වෙනවා. දකුණු අප්‍රිකාවේ කණ්ඩායමේ සාමාජිකයන් හතළිහක් සිටිනවා. ලංකාවෙන් සහභාගි වෙන්නේ මම විතරයි. මේක ආරම්භයක් විතරයි. ඉදිරියේදී අපේ රට නියෝජනය කිරීමට කණ්ඩායමක් ඉදිරිපත් කිරීමට මූලිකත්වය ගෙන කටයුතු කිරීමට මම බලාපොරොත්තු වෙනවා.” යැයි අයේන්ද්‍රා වැඩිදුරටත් අදහස් දක්වමින් පවසා සිටියාය. සචිනි හෙට ඇමෙරිකාව බලා පිටත්වීමට නියමිතය.