තිරසාර සංවර්ධන ඉලක්ක ධජය ශ්‍රී ලංකාවේදී ඔසවයි

ජාත්‍යන්තර එස්.ඩී.ජී. ධජ දිනයට (SDG Flag Day) සමාන්තරව, ශ්‍රී ලංකාවේ නෙදර්ලන්ත තානාපති කාර්යාලය, එක්සත් ජාතීන්ගේ සංවිධානය සහ ශ්‍රී ලංකා තිරසාර සංවර්ධන මණ්ඩලය ඒකාබද්ධව තානාපති කාර්යාල පරිශ්‍රයේදී තිරසාර සංවර්ධන ධජය උත්සවාකාරයෙන් ඔසවන ලදී.

ශ්‍රී ලංකාවේ තිරසාර සංවර්ධන ඉලක්ක (SDG) ධජ ව්‍යාපාරය සනිටුහන් කරමින්, ශ්‍රී ලංකාවේ නෙදර්ලන්ත තානාපති විබේ ද බෝර්, ශ්‍රී ලංකාවේ එක්සත් ජාතීන්ගේ නිත්‍ය සම්බන්ධීකාරක මාර්ක්-ඇන්ඩ්‍රේ ෆ්‍රැන්චේ සහ ජනාධිපති ලේකම් මෙන්ම ශ්‍රී ලංකා තිරසාර සංවර්ධන මණ්ඩලයේ සභාපති ආචාර්ය නන්දික සනත් කුමනායක යන මහත්වරුන් විසින් මෙහිදී ඒකාබද්ධව ධජය එසවීම සිදුකරන ලදී. මෙම අවස්ථාව සඳහා කොළඹ පදනම් කරගත් තානාපතිවරුන් සහ ශ්‍රී ලංකාව තුළ තිරසාර සංවර්ධන ඉලක්ක ළඟාකර ගැනීම සඳහා දායක වන සිවිල් සමාජයේ ප්‍රධාන නියෝජිතයෝ පිරිසක්ද එක්ව සිටියහ.

මෙහිදී අදහස් දක්වමින් තානාපති විබේ ද බෝර් මහතා, “අපි සැවොම එක්ව තිරසාර සංවර්ධන ධජය නැංවීම මඟින් තිරසාර සංවර්ධන ඉලක්ක වෙනුවෙන් අඛණ්ඩව කැපවීමේ අතිමහත් වැදගත්කම අවධාරණය කෙරෙනවා. 2030 වසර දෙසට ගමන් කිරීමේදී SDGs ක්‍රියාත්මක කිරීමේ වැදගත්කම පෙන්වා දීම සඳහා ලොව පුරා බොහෝ රටවල ගොඩනැගිලි, සමාගම්, අධ්‍යාපන ආයතන, පුස්තකාල සහ නගර සභාවල මෙම ධජය ඔසවනු ලැබෙනවා” යැයි පවසා සිටියේය.

මාර්ක්-ඇන්ඩ්‍රේ ෆ්‍රැන්චේ මහතා අදහස් දක්වමින්, “බහුපාර්ශ්විකත්වය තර්ජනයට ලක්ව ඇති මෙවැනි සමයක, තිරසාර සංවර්ධනය වැනි හවුල් රාමුවක් වෙන කවරදාටත් වඩා වැදගත් වෙනවා. එය රජයට, සිවිල් සමාජයට, පෞද්ගලික අංශයට සහ හවුල්කරුවන්ට ප්‍රගතිය විනිවිදභාවයෙන් යුතුව ලුහුබැඳීම සඳහා පොදු භාෂාවක් සහ හවුල් මිනුම් දඬු සපයනවා. තවද, මැජික් චක්‍ර (මැතිවරණ චක්‍ර) ඉක්මවා යන සැලසුම්කරණයට සහාය වන එය, මූල්‍ය අවකාශය සීමිත වී ඇති මොහොතක දේශීය ප්‍රයත්නයන් ජාත්‍යන්තර සහයෝගීතාවය සමඟ සම්බන්ධ කරනවා” යැයි පවසා සිටියේය.

ඉදිරි දැක්ම සහ වැඩසටහන

තානාපති කාර්යාලයේ පැවති මෙම ධජය එසවීමේ උත්සවයෙන් අනතුරුව, 2030 වන විට තිරසාර සංවර්ධන ඉලක්ක ළඟා කර ගැනීමේ ගමනේදී ශ්‍රී ලංකාව වර්තමානයේ පවතින තත්ත්වය පිළිබඳව තානාපති ප්‍රජාව සහ සිවිල් සමාජ නියෝජිතයන් අතර සාකච්ඡාවක්ද පවත්වන ලදී.

මෙම සජීව සාකච්ඡාවේදී ශ්‍රී ලංකාව මේ දක්වා ළඟා කර ගෙන ඇති ප්‍රගතිය මෙන්ම, රට ඉදිරියේ ඇති අභියෝග සහ 2030 න්‍යාය පත්‍රය (2015 සැප්තැම්බර් මාතාවේදී තිරසාර සංවර්ධන ඉලක්ක ළඟා කර ගැනීම සඳහා එක්සත් ජාතීන්ගේ සාමාජික රටවල් 193ක් විසින් අනුමත කරන ලද ගෝලීය ක්‍රියාකාරී සැලැස්ම) වෙත ළඟා වීමට ඇති අවස්ථා පිළිබඳව පුළුල් ලෙස අවධානය යොමු කරන ලදී.