ශ්‍රී ලංකාව හා මාලදිවයන අතර ද්වීපාර්ශ්වික ගිවිසුම් 3ක්

ශ‍්‍රී ලංකා රජය සහ මාලදිවයින් රජය අතර ද්විපාර්ශ්වික සහයෝගීතා ගිවිසුම් 03ක් ඊයේ (25) සවස මාලේ නුවර ජනාධිපති කාර්යාලයේ දී ජනාධිපති මහින්ද රාජපක්‍ෂ මැතිතුමා සහ මාලදිවයින් ජනාධිපති අබ්දුල්ලා යමීන් අබ්දුල් ගයූම් (Abdulla Yameen Abdul Gayoom) මැතිතුමා හමුවේ අත්සන් තැබිණි.

ඉන් පළමුවැන්න සෞඛ්‍යය ක්ෂේත්‍රයේ සංවර්ධනය සඳහා වූ අවබෝධතා ගිවිසුමකි. ශ‍්‍රී ලංකාව වෙනුවෙන් විදේශ අමාත්‍ය මහාචාර්ය ජී.එල්. පීරිස් සහ මාලදිවයින් හි සෞඛ්‍යය හා ස්ත‍්‍රී පුරුෂභාවය පිළිබඳ ඇමතිනී මාරියාම් ශකීලා මහත්මිය ඊට අත්සන් තැබූහ. සෞඛ්‍යය ක්ෂේත්‍රයේ විශේෂඥ සහ පුහුණු කාර්ය මණ්ඩල හුවමාරුව, හෙද පුහුණුව සහ උපදේශක සේවා සැලසීම එමගින් අපේක්‍ෂා කෙරෙයි.

දෙවැන්න ශ‍්‍රී ලංකා ආයෝජන මණ්ඩලය සහ මාලදිවයින් හි ආර්ථික සංවර්ධන අමාත්‍යාංශය අතර ගිවිසුමකි. දෙරට අතර ආයෝජන ප‍්‍රවර්ධනය එහි මූලික අරමුණ වෙයි. ඊට අත්සන් තබන ලද්දේ විදේශ අමාත්‍ය මහාචාර්ය ජී.එල්. පීරිස් සහ මාලදිවයින් හි ආර්ථික සංවර්ධන අමාත්‍ය මොහොමඩ් සයීද් යන මහත්වරුන් විසිනි.

සෙවීම් සහ බේරා ගැනීමේ සේවා සම්බන්ධීකරණය සඳහා වූ තුන් වැනි ගිවිසුමට මහාචාර්ය ජී.එල්. පීරිස් සහ මාලදිවයින් විදේශ ඇමතිනී දුන්යා මවුමූන් මහත්මිය අත්සන් කළහ. මුහුදේ දී විපතට පත් වන අය සොයා ගැනීමේ සහ බේරා ගැනීමේ කාර්යයන් සම්බන්ධීකරණය ඉන් ආවරණය කෙරේ.

උසස් අධ්‍යාපන අමාත්‍ය එස්.බී. දිසානායක, විදේශ අමාත්‍යාංශයේ අධීක්‍ෂණ මන්ත‍්‍රී සජින් ද වාස් ගුණවර්ධන, පාර්ලිමේන්තු මන්ත‍්‍රීවරුන් වන ඒ.එච්.එම්. අස්වර්, උදිත් ලොකුබණ්ඩාර, ලොහාන් රත්වත්තේ, රංජිත් ද සොයිසා සහ තේනුක විදානගමගේ, ජනාධිපති ලේකම් ලලිත් වීරතුංග යන මහත්වරු සහ විදේශ අමාත්‍යාංශයේ ලේකම් ෂෙනුකා සෙනෙවිරත්න මහත්මිය ද මේ අවස්ථාවට එක්ව සිටියහ.