රවි රු. බිලියන 2ක වන්දි මුදලක් බන්දුලගෙන් ඉල්ලයි

මුදල් අමාත්‍ය රවී කරුණානායක මහතා පාර්ලිමේන්තු මන්ත්‍රී බන්ධුල ගුණවර්ධන මහතාගෙන් රු.බිලියන දෙකක වන්දියක් ඉල්ලා එන්තරවාසියක් යවා ඇති බව වාර්තා වේ.

බැඳුම්කර කොමිසම හමුවේ පෙනී සිටි බන්ධුල ගුණවර්ධන මහතා, මාධ්‍ය ඉදිරියේ ව්‍යාජ තොරතුරු ප්‍රකාශ නොකරන ලෙස එම කොමිසම ලබාදුන් අවවාදය සම්බන්ධයෙන් රවි කරුණානායක මහතා මාධ්‍යයට සිදුකළ ප්‍රකාශයකට එරෙහිව එවන ලද එන්තරවාසියට පිළිතුරු වශයෙන් මෙසේ රු.බිලියන දෙකක (රුපියල් මිලියන 2000ක) වන්දියක් ඉල්ලා මුදල් අමාත්‍යවරයා සිය නීතීඥවරුන් මාර්ගයෙන් බන්ධුල ගුණවර්ධන මහතාට එන්තරවාසි යවා ඇති බව මුදල් අමාත්‍යාංශය පවසයි.

එමගින් රවි කරුණානායක මහතා බන්දුල ගුණවර්ධන මහතාට දන්වා ඇත්තේ මාධ්‍යට ප්‍රකාශ කළ අදාළ කරුණු සමග පමණක් තමා එකඟ වන අතරම බන්ධුල ගුණවර්ධන මහතා විසින් එවා ඇති එන්තරවාසියේ සඳහන් අනෙකුත් සියලු දැඩි චෝදනා තරයේ ප්‍රතික්ෂේප කරන බවයි. එහි තවදුරටත් සඳහන් කර ඇත්තේ බැඳුම්කර නිකුත් කිරීම සම්බන්ධයෙන් පරීක්ෂණ පවත්වන ජනාධිපති කොමිසම ඉදිරියට, බන්ධුල ගුණවර්ධන මහතා කැඳවූයේ කුමන අරමුණක් සඳහා දැයි සහ ඔහු දෙන ලද සාක්ෂිවල අඩංගු කරුණු මොනවා දැයි අමාත්‍ය රවි කරුණානායක මහතා තුළ පූර්ව දැනුවත් බවක් නොතිබූ බවයි.

බැඳුම්කර සිද්ධිය සම්බන්ධව සාවද්‍ය තොරතුරු ප්‍රකාශ කර ඇති බවට බන්ධුල ගුණවර්ධන මහතා කොමිසම ඉදිරියේ පිළිගත් බවත්, එවැනි සාවද්‍ය ප්‍රකාශ මින් ඉදිරියට සිදු නොකරන ලෙස, එම කොමිසම ඔහුට අවවාද කළ බවට, රවී කරුණානායක මහතා දැනුවත් වූයේ, එම තොරතුරු ජනමාධ්‍යවල පළවීමෙන් පසුව බවත් එන්තරවාසියේ සඳහන් කර ඇති බවත් අමාත්‍යාංශය පවසයි. කෙසේ වුවත් මෙම සිදු වීමට අදාළව රවී කරුණානායක මහතා මාධ්‍යයට කරන ලද ප්‍රකාශවල, බන්ධුල ගුණවර්ධන මහතා සම්බන්ධයෙන් කිසිදු අපහාසාත්මක හෝ ද්වේශසහගත ප්‍රකාශයක් සිදු නොකළ බව එම එන්තරවාසියේ සඳහන් කර ඇති බවත්, ඒ අනුව බන්ධුල ගුණවර්ධන මහතා, රවී කරුණානායක මහතාට විරුද්ධව රුපියල් මිලියන 300ක වන්දියක් ඉල්ලන්නේ නම්, ඊට එරෙහිව රුපියල් මිලියන 2000ක වන්දියක් ඉල්ලා නඩු පවරන බවත් රවී කරුණානායක මහතාගේ නීතීඥයන් විසින් බන්ධුල ගුණවර්ධන මහතා වෙත යවන ලද එන්තරවාසියේ වැඩිදුරටත් සඳහන් වන බව අමාත්‍යාංශය පවසයි.