මූල්‍ය බුද්ධි ඒකකය සිංගප්පූරු STRO සමග ගිවිසුමකට

ශ්‍රී ලංකා මූල්‍ය බුද්ධි ඒකකය (FIU-Sri Lanka), සිංගප්පූරුවේ සැකකටයුතු ගනුදෙනු වාර්තා කිරීමේ කාර්යාලය (STRO) සමග පසුගිය සැප්තැම්බර් 01 වැනිදා අවබෝධතා ගිවිසුමකට එළැඹ ඇත.

2006 අංක 06 දරණ මුදල් ගනුදෙනු වාර්තා කිරීමේ පනතේ විධිවිධාන ප්‍රකාරව ශ්‍රී ලංකා මූල්‍ය බුද්ධි ඒකකය මෙම අවබෝධතා ගිවිසුමට එළැඹ ඇති බව ශ්‍රී ලංකා මහ බැංකුව පවසයි. අන්‍යෝන්‍ය අවබෝධතාව සහ එකිනෙකා පිළිබඳව දක්වන සහයෝගීතාව හා සැලකිල්ල පදනම් කරගෙන, එක් එක් ආයතනයට අදාළ ජාතික ව්‍යවස්ථාපිත රාමුව තුළ හිඳිමින් මුදල් විශුද්ධිකරණය සහ ත්‍රස්තවාදීන්ට අරමුදල් සැපයීමට අදාළව පරීක්ෂණ සහ නඩු පැවරීම්වලට තොරතුරු හුවමාරු කරගැනීමට අවස්ථාවක් සලසාදීම මෙම අවබෝධතා ගිවිසුම්වලට එළැඹීමේ මූලික පරමාර්ථය බවද මහ බැංකුව පෙන්වා දෙයි.

මුදල් විශුද්ධිකරණය සහ ත්‍රස්තවාදයට අරමුදල් සැපයීම යනු ජාත්‍යන්තර වශයෙන් එකිනෙකට සම්බන්ධ වන මූල්‍ය අපරාධ වන අතර, එමගින් ගෝලීය ආර්ථිකයේ සහ මූල්‍ය පද්ධතියේ ස්ථායීතාවට තර්ජනයක් එල්ලවීමේ හැකියාව ඇති බවද කියයි. එබැවින්, මුදල් විශුද්ධිකරණය සහ ත්‍රස්තවාදයට අරමුදල් සැපයීමට විරුද්ධව කටයුතු කිරීම සඳහා මූල්‍ය බුද්ධි ඒකකයන් අතර, ගෝලීය සම්බන්ධීකරණයක් පැතීම අත්‍යවශ්‍ය බවද පෙන්වා දෙයි. මේ අනුව, පරීක්ෂණ කටයුතුවලට අවශ්‍ය තොරතුරු හුවමාරු කරගැනීම සඳහා සිංගප්පූරුවේ සැකකටයුතු ගනුදෙනු වාර්තා කිරීමේ කාර්යාලය සමග අත්සන් කරනලද අවබෝධතා ගිවිසුමද ඇතුළත්ව විදේශීය මූල්‍ය බුද්ධි ඒකකයන් 32ක් සමග ශ්‍රී ලංකා මූල්‍ය බුද්ධි ඒකකය මේ වනවිට අවබෝධතා ගිවිසුම් අත්සන් කර ඇති බවද මහ බැංකුව වැඩිදුරටත් පෙන්වා දෙයි.