CICT පර්යන්තය අතිවිශිෂ්ට බහාලුම් හැසිරවීමක් කරලා

කොළඹ ජාත්‍යන්තර බහාලුම් පර්යන්තය (CICT), පසුගියදා එහි පැමිණි ‘MSC ඉන්ගි’ (MSC INGY) නෞකාව සාර්ථකව හසුරුවා, බහාලුම් 10,407ක සංචලනය, එනම් TEU 15,113ක විශිෂ්ට මෙහෙයුමක් වාර්තා කර තිබේ.

මෙතෙක් CICT විසින් එක් නෞකාවකින් හසුරුවා ඇති ඉහළම බහාලුම් පරිමාව වන මෙම ජයග්‍රහණය, පර්යන්තයේ නව මෙහෙයුම් සන්ධිස්ථානයක් බවට පත්ව ඇත.

මෙඩිටරේනියන් ශිපින් සමාගම (MSC) මෙහෙයවන ‘MSC ඉන්ගි’ නෞකාව, කොළඹ වරායට පැමිණෙන දැවැන්ත බහාලුම් නෞකාවලින් එකක් වන අතර, එහි කාර්යක්ෂම හැසිරවීම, අති විශාල බහාලුම් යාත්‍රා (ULCV) මෙහෙයුම් සඳහා CICT හට ඇති හැකියාව මෙන්ම ඉහළ යමින් පවතින බහාලුම් බඩු පරිමාවන්ද තහවුරු කරයි. 

මෙම මෙහෙයුම තුළදී, පැයකට බහාලුම් මෙහෙයුම් 200 ඉක්මවූ සමස්ත නෞකා මෙහෙයුම් අනුපාතයක් සහ පැයකට එක් දොඹකරයකින් මෙහෙයුම් 30 ඉක්මවූ සමස්ත දොඹකර මෙහෙයුම් අනුපාතයක් CICT විසින් වාර්තා කළේය. මෙම වාර්තාව, ක්‍රියාවලිය පිටුපස පැවති වේගය, සංවිධානාත්මකභාවය සහ නිපුණත්වය තවදුරටත් සනාථ කරයි. 

CICT හි ප්‍රධාන විධායක නිලධාරී ජැන් ෂැන්ග් මහතා  අදහස් දක්වමින්, "මෙම සන්ධිස්ථානය වෙත සාර්ථකව පිවිසීම, අපගේ ශක්තිමත් මෙහෙයුම් ක්‍රියාකාරීත්වය සහ අති විශාල බහාලුම් නෞකා (ULCVs) උපරිම කාර්යක්ෂමතාවයෙන් හැසිරවීම සඳහා අප සතු හැකියාව මනාව පිළිබිඹු කරනවා. CICT සමාගම අපගේ ගෝලීය නාවික හවුල්කරුවන්ට විශ්වාසනීය සහ ඉහළ ක්‍රියාකරීත්වයෙන් යුත් පර්යන්ත සේවා අඛණ්ඩව ලබාදීමට කැපව සිටිනවා." යැයි පවසා සිටියේය.

චයිනා මර්චන්ට් පෝර්ට් හෝල්ඩින්ග්ස් විසින් මෙහෙයවනු ලබන කොළඹ ජාත්‍යන්තර බහාලුම් පර්යන්තය, අංගන ප්‍රශස්තිකරණය, යන්ත්‍රෝපකරණ, සහ ක්‍රියාවලි වැඩිදියුණු කිරීම් සඳහා ආයෝජනය කිරීම තුළින් තම ප්‍රවීණත්වය නිරතුරුව ඉහළ නංවමින් සිටී. මෑතකදී, කොළඹ වරායට පැමිණ ඇති දැවැන්ත නෞකා කිහිපයක් හැසිරවීම තුළින්, ප්‍රධාන කාර්යභාරයක් CICT විසින් ඉටු කර ඇති අතර, එමඟින් දකුණු ආසියාවේ ප්‍රමුඛ පෙළේ ප්‍රතිනැව්ගත කිරීමේ මධ්‍යස්ථානයක් ලෙස කොළඹ වරායේ ස්ථාපිතය තවදුරටත් ශක්තිමත් කිරීමට දායකව ඇත.

මෙම ජයග්‍රහණය අත්කර ගැනීමට සහාය ලබා දුන් MSC ඇතුළු අනෙකුත් සියලුම හවුල්කරුවන්ට CICT සිය කෘතඥතාව පළ කරන බවත්, ඉහළ ප්‍රමිතීන්ට අනුව කොළඹ හරහා බහාලුම් කර්මාන්තය පවත්වාගෙන යාමට අඛණ්ඩ සහයෝගීතාවය ඉතා වැදගත් බවත් ෂැන්ග් මහතා අවධාරණය කළේය.