2026 ලෝක සහ ශ්‍රී ලංකා ආර්ථික අනාගතය ගැන තොරතුරු රැසක්

ස්ටෑන්ඩර්ඩ් චාර්ටඩ් බැංකුව විසින් සංවිධානය කරන ලද වාර්ෂික ආර්ථික විශ්ලේෂණ සමුළුව (Global Research Briefing) පසුගියදා පැවැත්විණි. මෙහිදී 2026 වසරේ ලෝක ආර්ථිකයේ ස්වභාවය සහ 'දිට්වා' සුළි කුණාටුවෙන් පසු ශ්‍රී ලංකාවේ ආර්ථිකය හැඩගැසෙන ආකාරය සම්බන්ධයෙන් ආර්ථික සහ වෙළෙඳපොළ විශේෂඥයින් විසින් සම්පාදනය කළ පුළුල් දත්ත පදනම් කරගනිමින්, කාලීන විග්‍රහයක් ඉදිරිපත් කරන ලදී.

ගෝලීය වශයෙන්, වර්තමානය වන විට පවතින දේශපාලනික නොසන්සුන්තා මධ්‍යයේ වුවද, ශ්‍රී ලංකාවේ ආර්ථිකය ස්ථාවර මට්ටමක පවතිනු ඇති බව බැංකුවේ විශ්ලේෂණ වාර්තා පෙන්වා දෙන අතර රජය විසින් ක්‍රියාත්මක කරන ආර්ථික ප්‍රතිසංස්කරණ සහ මූල්‍ය විනය ක්‍රියාකාරකම් හේතුවෙන් ශ්‍රී ලංකාව කෙරෙහි ආයෝජකයින් තුළ ඇති විශ්වාසය තවදුරටත් වර්ධනය වෙමින් පවතින බව මෙහිදී අවධාරණය කෙරිණි.

මෙම සමුළුවේදී ස්ටෑන්ඩර්ඩ් චාර්ටඩ් බැංකුවේ ගෝලීය ආර්ථික විද්‍යාඥ මධූර් ජා, දකුණු ආසියානු කලාපීය ආර්ථික විද්‍යාඥ සෞරව් ආනන්ද් සහ විදේශ විනිමය පිළිබඳ පර්යේෂණ ප්‍රධානී දිව්‍යා දේවේෂ් යන මහත්ම මහත්මීන්, ලෝක වෙළෙඳාම සහ මුදල් ඒකකවල හැසිරීම් පිළිබඳව අදහස් දැක්වූහ. විශේෂයෙන්ම ශ්‍රී ලංකාව ලබාගෙන ඇති ආර්ථික ස්ථාවරත්වය සහ ඉදිරියටත් ප්‍රතිසංස්කරණ පවත්වාගෙන යාමේ වැදගත්කම පිළිබඳව ඔවුන් මෙහිදී කරුණු පැහැදිලි කළහ. මුදල් අමාත්‍යාංශයේ සහ මහා භාණ්ඩාගාරයේ ලේකම් හර්ෂණ සූරියප්පෙරුම මහතා මෙහි ප්‍රධාන දේශනය පවත්වමින්, 'දිට්වා' සුළි කුණාටුවෙන් සිදු වූ බලපෑමෙන් පසු ආර්ථිකය යථා තත්ත්වයට පත් කිරීමට රජය ගන්නා පියවර සහ දිගුකාලීන ආර්ථික ස්ථාවරත්වය සඳහා රජයේ ප්‍රමුඛතා මොනවාද යන්න පිළිබඳව කරුණු ඉදිරිපත් කළේය.

මෙම සමුළුව සම්බන්ධයෙන් අදහස් දක්වමින් ස්ටෑන්ඩර්ඩ් චාර්ටඩ් ශ්‍රී ලංකා හී ප්‍රධාන විධායක නිලධාරී බිංගුමාල් තෙවරාතන්ත්‍රී මහතා, "ගෝලීය ආර්ථිකය පරිණාමය වෙමින් පවතින පසුබිමක, මෙවන් කාලෝචිත ආර්ථික විග්‍රහයන් ඉතාමත් වැදගත් වේ. එමෙන්ම, දිට්වා සුළි කුණාටුවේ බලපෑම් හමුවේ, ශ්‍රී ලංකාව තුල සාර්ව ආර්ථික ස්ථාවරත්වය සහ ප්‍රතිසංස්කරණ අඛණ්ඩව පවත්වාගෙන යාම කෙරෙහි අවධානය යොමු කිරීම අත්‍යවශ්‍ය වෙනවා. අපගේ ගනුදෙනුකරුවන්ට නිවැරදි ආර්ථික තොරතුරු ලබා දෙමින් සහ රජයේ ප්‍රතිපත්ති සම්පාදකයින් සමඟ එක්ව කටයුතු කරමින් රටේ ආර්ථික විශ්වාසය ගොඩනැගීමට ස්ටෑන්ඩර්ඩ් චාර්ටඩ් බැංකුව සැමවිටම කැපවී සිටිනවා." යැයි පවසා සිටියේය.

නිවැරදි තොරතුරු සහ වෙළෙඳපොළ විශ්ලේෂණයන් හරහා සිය ගනුදෙනුකරුවන්ට නිවැරදි තීරණ ගැනීමට සහ නව අවස්ථාවන් හඳුනා ගැනීමට සහාය වීම ස්ටෑන්ඩර්ඩ් චාර්ටඩ් බැංකුවේ මූලික අරමුණ බව මෙම සමුළුව මගින් නැවත වරක් තහවුරු විය.