කොමර්ෂල් බැංකු සමූහය පළමු මාස 9ට රු.බිලියන 318.8 ක දළ ආදායමක් ලබයි
2026 වසරේ තුන්වන කාර්තුව තුළ කොමර්ෂල් බැංකු සමූහය සිය ව්යාපාරික පරිමාවන් සහ ශේෂ පත්රයෙහි ස්ථාවර වර්ධනයක් වාර්තා කරමින් වසරේ පළමු මාස නවය අවසානයේදී කැපී පෙනෙන ශක්තිමත් ස්ථානයක සිටින බව දැනුම් දෙයි.
ශ්රී ලංකාවේ විශාලතම පුද්ගලික අංශයේ බැංකුව හා අනුබද්ධිත සමාගම් හයකින් සමන්විත මෙම සමූහය 2026 සැප්තැම්බර් 30 වැනිදායින් අවසන් වූ මාස නවය තුළදී රුපියල් බිලියන 318.79 ක දළ ආදායමක් වාර්තා කර ඇත. එය 18.87% ක වර්ධනයක් වන අතර මෙම කාලසීමාව තුළ පොලී ආදායම ද 20.52% කින් වර්ධනය වී රුපියල් බිලියන 266.98 ක් ලෙස සටහන් විය. ණය පොතෙහි යහපත් වර්ධනය හ හේතුවෙන් තෙවන කාර්තුවේ පමණක් දළ ආදායම රුපියල් බිලියන 109.63 ක් දක්වා 20.01% කින් ඉහළ ගොස් ඇත.
පොලී අනුපාත ඉහළ යාම සහ තැන්පතු ප්රමාණයේ කැපී පෙනෙන වර්ධනය යන සාධක දෙකෙහි එකතුවෙන් සලකා බලන මාස නවය තුළ පොලී වියදම රුපියල් බිලියන 145.92 ක් දක්වා 23.62% කින් වර්ධනය වී ඇත. එහි ප්රතිඵලයක් ලෙස, සමූහයේ ශුද්ධ පොලී ආදායම, මාස නවයක කාලය සඳහා රුපියල් බිලියන 121.06 ක් ලෙසද, තෙවන කාර්තුව සඳහා රුපියල් බිලියන 41.36 ක් වශයෙන් ද වාර්තා වූ අතර එය පිළිවෙලින් 16.98% සහ 19.30% ක වර්ධන අගයන් පෙන්නුම් කරයි.
මෙම මාස නවය සඳහා සමස්ත මෙහෙයුම් ආදායම රුපියල් බිලියන 160.33 ක් දක්වා 14.37% කින් වැඩි වූ අතර, විචක්ෂණශීලි පියවරක් ලෙස හානිපූර්ණ ගාස්තු සහ අනෙකුත් පාඩු සඳහා ප්රතිපාදන රුපියල් බිලියන 16.57 ක් දක්වා 17.84% කින් ඉහළ නැංවූ බව සමූහය වාර්තා කළේය. මේ හේතුවෙන් අදාළ කාලසීමාව සඳහා ශුද්ධ මෙහෙයුම් ආදායම රුපියල් බිලියන 143.76 ක් ලෙස වාර්තා වූ අතර එය 13.98% ක වර්ධනයකි.
කාර්ය මණ්ඩල පිරිවැය ඉහළ යාම, තාක්ෂණය මත යෙදවූ ආයෝජන හා ඒ ආශ්රිත වියදම් හේතුවෙන් මාස නවයක කාලය තුළ මෙහෙයුම් වියදම් රුපියල් බිලියන 47.27 ක් දක්වා 19.94% කින් ඉහළ ගොස් ඇත. එහි ප්රතිඵලයක් ලෙස මෙම කාලසීමාව තුළදී මූල්ය සේවා සඳහා බදු ගෙවීමට පෙර මෙහෙයුම් ලාභය 11.27% කින් වර්ධනය වී රුපියල් බිලියන 96.49 ක් විය.
ආදාළ කාලසීමාව තුළදී මූල්ය සේවා මත පනවා ඇති බදු රුපියල් බිලියන 16.75 ක් දක්වා 25.35% කින් ඉහළ ගොස් ඇති අතර එමඟින් සමූහය විසින් වාර්තා කරන ලද බදු ගෙවීමට පෙර ලාභය රුපියල් බිලියන 79.74 ක් වූ අතර එය 8.71% ක වර්ධනයක් විය. එම කාල සීමාව සඳහා ආදායම් බදු රුපියල් බිලියන 27.57 ක් දක්වා 8.86% කින් ඉහළ ගොස් ඇති අතර එහි ප්රතිඵලයක් ලෙස සලකා බලන මාස නවය තුළ සමූහයේ ශුද්ධ ලාභය රුපියල් බිලියන 52.16 ක් ලෙස වාර්තා විය. එය 8.63% ක වර්ධනයකි.
“පොලී අනුපාත ඉහළ යන වාතාවරණයක් පැවතිය ද, වසරේ දෙවන සහ තෙවන කාර්තු දෙක තුළදී බැංකු ක්ෂේත්රයට අදාළ වෙළඳපල ගතිකත්වයන් බොහෝ දුරට ස්ථාවරව පැවතුණා” යැයි කොමර්ෂල් බැංකුවේ සභාපති ෂර්හාන් මුෂීන් මහතා පැවසීය. "මෙවන් පසුබිමක් තුළදී වුව ද අපගේ ප්රධාන මූල්ය දර්ශකයන් ඔස්සේ ස්ථාවර කාර්යසාධනයක් පවත්වා ගැනීමට අපට හැකිවුණා. නොසැලී සිටීමේ හැකියාව සහ තිරසර වර්ධනය එලෙස ම පවත්වා ගනිමින් වෙළෙඳපාළ වෙනස්වීම්වලට කඩිනම් ලෙස හා උපායමාර්ගිකව ප්රතිචාර දැකිවීම සඳහා ගෝලීය වශයෙන් සිදුවන වෙනස්කම් සහ ඒවා ශ්රී ලාංකේය ව්යාපාරික ක්ෂේත්රයට බලපාන ආකාරය පිළිබඳව අපි අඛණ්ඩව සමීප අවධානයෙන් සිටිනවා" යැයි සභාපතිවරයා වැඩිදුරටත් සඳහන් කළේය.
කොමර්ෂල් බැංකුවේ කළමනාකාර අධ්යක්ෂ සහ ප්රධාන විධායක නිළධාරී සනත් මනතුංග මහතා අදහස් දක්වමින්, "වසරේ පළමු මාස නවය තුළ බැංකුව සහ සමූහ ව්යාපාරය තැන්පතු මෙන්ම ණය යන අංශ දෙකෙහිම ස්ථාවර වර්ධනයක් අඛණ්ඩව වාර්තා කර තිබෙනවා. එය මෙම අංශ වල ස්ථාවරත්වය සහ ඔරොත්තු දීමේ හැකියාව මනාව පෙන්නුම් කරන්නක්. අපගේ මූලික බැංකු මෙහෙයුම් කෙරෙහි මෙන් ම අපගේ සියලු ම පාර්ශ්වකරුවන් හා දේශීය ජාතික ආර්ථිකය වෙනුවෙන් ඉටු කළ යුතු වගකීම් කෙරෙහි න නොසැලෙන අවධානයක් යොමු කරමින් අපි කටයුතු කරනවා. අභියෝගාත්මක කාලසීමාවන් වලදී පවා අපගේ ඉලක්කය සහ ගමන් මඟ නොවෙනස්ව පවත්වා ගැනීමට අපට ඇති හැකියාව, මෙම මාස නවය තුළ අපගේ කාර්යසාධනය මගින් මනාව පිළිබිඹු වෙනවා” යැයි පැවසීය.
ණය දෙන්නෙකු ලෙස බැංකුව ඉටු කරන කාර්යභාරයේ තරම මනාව පෙන්නුම් කරමින් මෙම මාස නවය තුළ සමූහයේ දළ ණය සහ අත්තිකාරම් වටිනාකම රුපියල් බිලියන 348.37 කින් නැතහොත් 16.70% කින් වර්ධනය වී ඇත. එහි මාසික සාමාන්යය අගය රුපියල් බිලියන 38.71 ක වර්ධනයක් පෙන්නුම් කරයි. මේ අනුව 2026 සැප්තැම්බර් 30 වන විට සමූහයේ සමස්ත ණය පොතේ අගය රුපියල් ට්රිලියන 2.43 දක්වා ඉහළ ග ොස්ඇත. ගෙවී ගිය මාස 12 තුළ ණය පොතේ වර්ධනය රුපියල් බිලියන 526.88 ක් හෙවත් 27.63% ක් වූ අතර එහි මාසික සාමාන්යය අගය රුපියල් බිලියන 43.91 කි.
මේ අතර 2026 සැප්තැම්බර් 30 වන දිනෙන් අවසන් වූ මාස නවය තුළ සමූහයේ තැන්පතු අගය රුපියල් බිලියන 418.98 කින් හෙවත් 15.52% කින් වර්ධනය වී ඇති අතර එය රුපියල් බිලියන 46.55 ක මාසික සාමාන්ය අගයකි. මේ අනුව සමූහයේ මුළු තැන්පතු ප්රමාණය රුපියල් ට්රිලියන 3.12 ක් දක්වා ඉහළ ගොස් ඇත. ගෙවී ගිය මාස 12 සඳහා තැන්පතුවල අගය රුපියල් බිලියන 530.30 කින් හෙවත් 20.49% කින් කැපී පෙනෙන ලෙස වර්ධනය වී ඇති අතර එය රුපියල් බිලියන 44.19 ක මාසික සාමාන්ය අගයකි. වසරේ තුන්වන කාර්තුව පමණක් ගත් කළ කොමර්ෂල් බැංකුවේ තැන්පතු ප්රමාණය ප්රථම වරට රුපියල් ට්රිලියන 3 සීමාව ඉක්මවා ගියේය.
සමූහයේ සමස්ත වත්කම් වල වටිනාකම 2026 සැප්තැම්බර් 30 වන විට රුපියල් ට්රිලියන 3.87 ක් දක්වා රුපියල් බිලියන 496.08 කින් වර්ධනය වූ අතර එය 14.68% ක කැපී පෙනෙන වර්ධනයකි. එමෙන්ම ගෙවී ගිය මාස 12 ක කාලය සඳහා මෙම වර්ධනය රුපියල් බිලියන 642.26 ක් හෙවත් 19.87% කි. 2026 වසරේ මුල් මාස නවය තුළ වාර්තා වූ වර්ධනය මාසික සාමාන්යක් ලෙස දැක්වූ විට රුපියල් බිලියන 55.12 ක් වන අතර, ගෙවී ගිය වසර තුළදී එම මාසික සාමාන්ය අගය රුපියල් බිලියන 53.52 කි.
popular news
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
