අපනයන ආදායම වාර්තා පිට වාර්තා තබයි

මෙරට අපනයන ආදායම් ඉතිහාසයේ නව සංධිෂ්ඨානයක් ලකුණු කරමින් මාසයක් තුළ ලබාගත් වැඩිම අපනයන ආදායම පසුගිය ජූලි මාසයේ දී වාර්තා වී ඇති බව ශ්‍රී ලංකා අපනයන සංවර්ධන මණ්ඩලය පවසයි.

ජූලි මාසයේ දී අපනයන ආදායම අමෙරිකානු ඩොලර් මිලියන 1,641 දක්වා ඉහළ ගොස් තිබේ. මෙහිදී භාණ්ඩ අපනයනයෙන් ඇමෙරිකානු ඩොලර් මිලියන 1304ක් හා  සේවා අංශයේ අපනයනයෙන් අමෙරිකානු ඩොලර් මිලියන 337ක ආදායමක් වාර්තා වී තිබේ.

ඇඟළුම්, තේ, පොල් ආශ්‍රිත නිෂ්පාදන සැකසු ආහාර වර්ග, ස්වර්ණාභරණ, එළවළු, පලතුරු ඇතුළු අංශවල ඉතාමත්ම කැපී පෙනෙන වර්ධනයක් මෙහිදී පෙන්වා තිබේ.

අමෙරිකාව මෙම අපනයන ආදායමට වැඩි දායකත්වයක් ලබාදී ඇති අතර එම අගය  ඩොලර් මිලියන 275 ඉක්මවා ගොස් තිබේ.

එසේම ජනවාරි සිට ජූලි දක්වා මාස 7ක අපනයන ආදායම අමෙරිකානු ඩොලර් බිලියන 9.89ක් වන අතර වසරක මුල් මාස 7 වාර්තා වූ වැඩිම අපනයන ආදායම ලෙසද මෙය වාර්තා අතරට එක්ව තිබේ.