ෆයිසර් එන්නත හදිසි භාවිතය සඳහා සමලෝචනයට - WHO

ෆයිසර් සහ බයෝඑටෙක් හි කොවිඩ්-19 එන්නත පිළිබඳව දත්ත තමන් වෙත ලැබී ඇති බවත්, හදිසි භාවිතය සඳහා හැකි ලැයිස්තුගත කිරීම සඳහා එය සමාලෝචනය කරමින් සිටින බවත් ලෝක සෞඛ්‍ය සංවිධානය (WHO) පවසයි.

ඒ අනුව මෙම සමාලෝචනයෙන් පසුව ලෝක සෞඛ්‍ය සංවිධානයේ අවසරය මෙම එන්නත වෙත ලැබුණොත්, ෆයිසර් එන්නත ජාතික වශයෙන් භාවිතය සඳහා බලය පැවරීම වෙනුවෙන් ලොවපුරා රටවලට මිණුම් ලකුණක් බවට එම අවසරය පත්වෙයි.

ලෝක සෞඛ්‍ය සංවිධානයේ හදිසි ලැයිස්තුගත කිරීම් කඩිනම් කිරීම සඳහා එක්සත් රාජධානියේ සෞඛ්‍ය හා සමාජ සත්කාර දෙපාර්තමේන්තුවේ විධායක ආයතනය වන ඖෂධ හා සෞඛ්‍ය නිෂ්පාදන නියාමන ඒජන්සියේ (MHRA) තක්සේරුවෙන් සමහර තොරතුරු ලබාගැනීමේ හැකියාව පිළිබඳව ලෝක සෞඛ්‍ය සංවිධානය, MHRA සමග සාකච්ඡා කරමින් සිටින බවද විදෙස් වාර්තා පවසයි.

බ්‍රිතාන්‍යය විසින් (MHRA විසින්) ඊයේ (02දා) ෆයිසර් එන්නත එරට ජනතාවට ලබාදීම සඳහා අනුමත කළේය. ඒ අනුව ලබන සතිය මුලදී එරට වෛරසය හේතුවෙන් වඩාත් අවදානමට ලක්විය හැකි පුද්ගලයන් වෙත එන්නත් මාත්‍රා ලබාදීම ඇරඹෙනු ඇත. මේ සමග එක්සත් ජනපදයට සහ යුරෝපයට ප්‍රථම විධිමත් ලෙස ෆයිසර් එන්නත් මාත්‍රා ලබාදීම අනුමත කළ රට බවටද බ්‍රිතාන්‍ය නිතැතින්ම පත්ව තිබේ.

කෙසේ වෙතත්  ලොවපුරා ජනතාවට එන්නතක් පැමිණීමට යම් කාලයක් ගතවන බැවින් දැනට කොවිඩ්-19 වසංගතයෙන් ජනතාව ආරක්ෂා කෙරෙන මහජන සෞඛ්‍ය ක්‍රියාාමාර්ග ලෙස මුඛ ආවරණ පැලඳීම, නිතර දෑත් සේදීම, සමාජ දුරස්ථභාවය පැවැත්වීම ආදී මූලික සෞඛ්‍යාරක්ෂණ පුරුදු කිසිලෙසකින්වත් ලිහිල් නොකරන ලෙස ලෝක සෞඛ්‍ය සංවිධානය මෙන්ම, සෞඛ්‍ය විශේෂඥයන් අවධාරණය කරයි.