සංචාරක කර්මාන්තය ගැන අගමැතිගෙන් විශේෂ ප්‍රකාශයක්

ශ්‍රී ලංකාවේ සංචාරක කර්මාන්තය යළිත් රටට ආදායම් ලබාදෙන කර්මාන්තයක් බවට ඉක්මනින්ම පත්වෙනු ඇති බව අග්‍රාමාත්‍ය රනිල් වික්‍රමසිංහ මහතා පවසයි.

ලෝක ප්‍රකට ‘ලෝන්ලි ප්ලැනට්’ සංචාරක සඟරාව යළිත් වරක් ශ්‍රී ලංකාව ලෝකයේ සංචාරය කිරීමට හොඳම රට ලෙස යළිත් ශ්‍රී ලංකාව නම් කිරීම සම්බන්ධයෙන් විශේෂ ප්‍රකාශක් කරමින් අග්‍රාමාත්‍යවරයා මේ බව ප්‍රකාශ කළේය.

"ශ්‍රී ලංකාව ලෝකයේ සංචාරය කළ යුතු හොඳම ගමනාන්තය බව ප්‍රසිද්ධ සංචාරක සගරාවක් වන "ලෝන්ලි ප්ලැනට්" සඟරාව මේ වසර ආරම්භයේදී ප්‍රකාශයට පත් කර තිබුණා. නමුත් පාස්කු ඉරිදා ප්‍රහාරයෙන් පසු ශ්‍රී ලංකාවේ සිටි සංචාරකයන් රටින් පිටව ගියා. ඒ අවස්ථාවේ ලෝන්ලි ප්ලැනට් සඟරාව සංචාරක ක්ෂේත්‍රය තුළ ශ්‍රී ලංකාවට ලබාදුන් ස්ථානය අපේ රටට අහිමිවී යනු ඇතැයි සියලුම දෙනා කල්පනා කළා.

නමුත් පසුගිය සතියේ ලෝන්ලි ප්ලැනට් සඟරාව නැවතත් ප්‍රකාශයට පත් කර තිබුණේ ගැටළු තිබුණත් තවමත් ලෝකයේ සංචාරය කළ යුතුම ගමනාන්තය ශ්‍රී ලංකාව බවයි. එය අපට ආඩම්බරයට කරුණක්.

විවිධ ගැටළු තිබුණත් ඒවා නොතකා ශ්‍රී ලංකාවේ ජනතාව සිනහමුසුව තමන්ව පිළගත් බවයි එම සඟරාව ප්‍රකාශ කර තිබෙන්නේ.  තමන් ශ්‍රී ලංකාව පුරා සංචාරය කළ බවත්, මේ වනවිට රට තුළ සංචාරය කිරීමට ගැටළුවක් නොමැති බවත් ඔවුන් පවසා තිබෙනවා.

මේ තුළින් ශ්‍රී ලංකාවේ අපිට විශාල ධෛර්යක් ලැබෙනවා. සංචාරක ව්‍යාපාරය නැවත නඟාසිටුවීමට අපේ රජය විසින් පියවර කිහිපයක්ම ගෙන තිබෙනවා. එවැනි පියවර රැසක් ඉදිරියටත් ගැනීමට මම බලාපොරොත්තු වෙනවා. පාස්කු ප්‍රහාරයෙන් පසුව සංචාරක ව්‍යාපාරය නැවත නඟාසිටුවීමට සංචාරක කර්මාන්තයේ නියැලෙන ලොකු කුඩා සියලුම පුද්ගලයන් ගත් උත්සාහයට මම ස්තූතිවන්ත වනවා.

අප්‍රේල් 21 ප්‍රහාරයෙන් පසු එදිනම ආරක්‍ෂක අංශ වෙත මම උපදෙස් ලබාදුන් පරිදි අයි.එස්.අයි.එස්. ත්‍රස්තවාදීන් සියලූදෙනාම අත්අඩංගුවට ගෙන මාස දෙකක් ගතවීමටත් පෙර රට නැවතත් යථාතත්වයට පත් කිරීම පිළිබඳව ආරක්‍ෂක අංශවලටත් ස්තඣතිය පිරිනමනවා.

ශ්‍රී ලංකාවේ සංචාරක කර්මාන්තය නැවතත් රටට ආදායම් ලබාදෙන කර්මාන්තයක් බවට ඉක්මනින් පත්වනු ඇති බව මම විශ්වාස කරනවා.”