ජපන් යන විදිහ මනුෂ කියයි

ජපානයේ නව රැකියා අවස්ථා සම්බන්ධයෙන් ඒ ඒ විෂයට අදාළව සුදුසුකම් හා පටිපාටිය ඉදිරියේ දි දැනුම් දෙන තුරු කිසිදු තැරැව්කාරයෙකුට හෝ ආයතන වලට හසුනොවී කටයුතු කරන්නැයි පාර්ලිමේන්තු මන්ත්‍රී මනුෂ  නානායක්කාර මහතා පවසයි.

මේ සම්බන්ධයෙන් අවශ්‍ය  සුදුසුකම් හා භාෂා ප්‍රවීණතාවයන් පිළිබඳ මේ වන විට ජපන් රජය සමග සාකච්ජා පවත්වමින් සිටින බවත් කිසිදු පෞද්ගලික ආයතනයකට හෝ පුද්ගලයෙකුට මේ සම්බන්ධයෙන් කිසිවක් භාරදී නොමැති බවත් එබැවින් වංචනිකයන්ට හසු නොවන ලෙස ද මන්ත්‍රීවරයා වැඩිදුරටත් සඳහන් කළේය.

විදේශ සේවා නියුක්ති කාර්යංශයේ පැවති මාධ්‍ය හමුවකට එක්වෙමින් මන්ත්‍රීවරයා සඳහන් කළේ මීට අදාළ වීසා බලපත්‍රය වසර 10ක කාලසීමාවක් සදහා ලබාදෙන බවයි.

වෘත්තීය ක්ෂේත්‍ර 14ක රැකියා සදහා වසර 10ක කාලයකට ජපන් රජය සමග එළඹි ගිවිසුමත් සමග විශාල ශ්‍රම බලකායක් ජපානයට යැවීමේ අවස්ථාව ලැබී ඇති බව ද මන්ත්‍රීවරයා සඳහන් කළේය.

එහිදී වැඩිදුරටත් අදහස් දැක්වු මනුෂ නානායක්කාර මහතා,

“මේ යටතේ රැකියා ක්ෂේත්‍ර 14ක් සදහා අපිට ශ්‍රමිකයන් යවන්න පුළුවන්. නැව් ඉදිකිරීම් හා නැව් යන්ත්‍ර උපකරණ ක්ෂේත්‍රය, ගුවන්සේවා කර්මාන්තය, විද්‍යුත් ඉලෙක්ට්‍රොනික හා තොරතුරු තාක්ෂණික, ආහාර පාන නිෂ්පාදනය, ධීවර හා ජලජීවි වගා, කෘෂිකර්මාන්තය, ඉදිකිරීම්, කාර්මික යන්ත්‍රෝපකරණ, යන්ත්‍ර කොටස් එකලස්කිරීම, සාත්තුසේවා, ගොඩනැගිලි පිරිසිදුකිරීම හා කළමණාකරණය, රථවාහන නඩත්තු සේවා, නවාතැන් සේවා හා ආහාර සේවා කර්මාන්තය යන ක්ෂේත්‍ර 14 ඔස්සේ ශ්‍රමිකයන් යවන්න පුළුවන්. මේවා ජපානයේ අමාත්‍යංශ ගණනාවකට බෙදිලා යනවා. මේ සියල්ල පිළිබද එකවර තොරතුරු ලබාදෙන්න ජපානයේ කිසිම ආයතනයක් සම්බන්ධ වෙන්නේ නැහැ.

ජපාන රජයත් සමග අප ගිවිසුම් ගතවනවාත් සමග එරට අනෙකුත් අමාත්‍යංශ වලට අදාළ රැකියා වලට අවශ්‍ය සුදුසුකම් ඇතුළු කරුණු ගැන ශ්‍රී ලංකා විදේශසේවා නියුක්ති කාර්යංශයේ සභාපතිවරයා දැනටමත් සාකච්ජා පවත්වනවා. එක් එක් විෂය ක්ෂේත්‍රයට අවශ්‍ය සුදුසුකම් අපිට වෙන් වෙන් වශයෙන් ඉදිරිපත් කරන්න වෙනවා. තවම ඒවා තීන්දු කරලා දෙරට අතර එකඟතාවයකට අප පැමිණ නැහැ. වයස් සීමාව ජපනයේ වයස් සීමාව බවට පත්වෙයි.

මේ ක්ෂේත්‍ර 14ට යන්න ඊට අවශ්‍ය වෘත්තීය දැනුමෙන් යුතුව තරුණ තරුණියන් අප හදාගත යුතුයි. ඒ වගේම ඒ ඒ ක්ෂේත්‍රයට අවශ්‍ය වන ප්‍රමාණයට මේ සියලු දෙනාම ජපන් භාෂාව පිළිබඳ  ප්‍රවීණතාවය ලබාගැනීමට අවශ්‍ය වෙනවා. මේ මට්ටම් වලට අප සකස් විය යුතුයි. නිකම්ම අපිට ජපානයට යන්න බැහැ. ඒ නිසා මේ සදහා අවශ්‍ය අධ්‍යාපන සුදුසුකම් ලැබීම ඉතාම අත්‍යාවශ්‍යයි. පන්නිපිටියේ හා අපේ අනෙකුත් පුහුණු මධ්‍යස්ථාන වලට ඉතාම සහනදායි මුදලට පාඨමාලාවන් හැදැරීමේ හැකියාව තියෙනවා.

ඒවගේම කිසිදු පෞද්ගලික ආයතනයකට හෝ පුද්ගලයෙකුට මේ සම්බන්ධයෙන් කිසිවක් භාරදී නැහැ. ඒ නිසා කිසිදු පුද්ගලයෙකුට හෝ ආයතනයකට මේ සම්බන්ධයෙන් අයදුම්පත් හෝ මුදල් ලබාදී වැඩක් නැහැ. කිසිදු නියෝජිතායතනයක් හෝ තැරව්කරුවෙකු මේ සදහා තෝරාගෙන නැහැ. මීට අදාළ  පසුබිම් වැඩ කටයුතු සිදුකරගන්න අපිට තව ටික කාලයක් අවශ්‍ය වෙනවා.

පසුව අපි ඒ ඒ විෂයට අදාළව සුදුසුකම් හා පටිපාටිය පිළිබඳ  දැනුවත් කරන්න බලාපොරොත්තු වෙනවා. ඒ නිසා කිසිදු  ලෙස අනවශ්‍ය පුද්ගලයන්ට මුදල් ගෙවන වංචා වලට හසු නොවන ලෙස ද ඉල්ලා සිටිනවා. කිසිදු වෘත්තීය සුදුසුකමක් හෝ ජපන් භාෂාව නොමැතිව මේ සදහා අයදුම් කරන්න බැහැ. ඒ නිසා මේ කාලය තුළ ඉවසිමෙන් යුතුව සුදුසුකම් හදාගන්න” යනුවෙන් මන්ත්‍රීවරයා වැඩිදුරටත් පැවසීය.

කෂිනි හපුආරච්චි