ජාතියේ මතු අනාගතය වෙනුවෙන් මත්ද්‍රව්‍යජාවාරම්කරුවන්ට මරණිය දණ්ඩනය දිය යුතුයි - ජනපති
පාසල් සිසුන්, විශ්වවිද්‍යාල සිසුන් ප‍්‍රමුඛ ලක්ෂ සංඛ්‍යාත තරුණ ජීවිත බිලිගනිමින් දිනෙන් දින ව්‍යාප්තවන නීතිවිරෝධි මත්ද්‍රව්‍ය ජාවාරම වලක්වමින් ජාතියේ සහ මතු පරපුරේ අනාගතය සුරක්ෂිත කිරීමට නම් මත්ද්‍රව්‍ය ජාවාරම්කරුවන්ට මරණීය දණ්ඩනය කි‍්‍රයාත්මක විය යුතු බව ජනාධිපති මෛත්‍රීපාල සිරිසේන මහතා පවසයි.
මත්ද්‍රව්‍ය ජාවාරම් සම්බන්ධයෙන් වැරදිකරුවන් වී බන්ධනාගාරගතව සිටින පුද්ගලයන් සිවු දෙනෙකුට මරණීය දණ්ඩනය ලබාදීම සඳහා තමා මේ වන විට අත්සන් තබා ඇති අතර ඊට විරුද්ධව කථා කරන සියලූ පිරිස් මත්ද්‍රව්‍ය ජාවාරමට සහය වන්නන් බව ද ජනාධිපතිතුමා කියා සිටියේය.
ජනාධිපති මෛතී‍්‍රපාල සිරිසේන මහතා මේ බව ප‍්‍රකාශ කළේ පොළොන්නරුව, ලංකාපුර විජිත මහා විද්‍යාලයේ අද (28) පෙරවරුවේ පැවති උත්සවයක දී ය.
මෙහිදී අදහස් දැක්වූ ජනාධිපතිතුමා වැඩිදුරටත් කියා සිටියේ මත්ද්‍රව්‍ය ජාවාරම්කරුවන්ට මරණීය දණ්ඩනය ලබාදීමට තමා අත්සන් තැබුවේ කිසිවෙකු කෙරෙහි වෛරයෙන් හෝ ක්‍රෝධයෙන් නොව මෙම දරුණු සමාජ ව්‍යසනයෙන් ජාතිය සහ මතු පරපුර බේරාගැනීම වෙනුවෙන් බවයි.
එබැවින් එම වැඩපිළිවෙළ ආපසු හැරවීමට කිසිවෙකු උත්සාහ නොදැරිය යුතු අතර එක්සත් ජාතින්ගේ මහලේකම්වරයා සමග ද තමා මේ පිළිබඳ ඊයේ රාති‍්‍රයේ දුරකථන සංවාදයක නිරතවෙමින් කරුණු පැහැදිලි කළ බවද ජනාධිපතිතුමා කියා සිටියේය.
මෙම උත්සව සභාව ඇමතූ ජනාධිපතිතුමා වැඩිදුරටත් සඳහන් කළේ නීතිවිරෝධි මත්ද්‍රව්‍ය ජාවාරමට එරෙහි සටන තමා අද ඊයේ ආරම්භ කළ එකක් නොවන බවයි. මෙම දරුණු සමාජ ව්‍යසනයෙන් ජාතිය ගලවා ගැනීම තමා ආරම්භ කළ දීර්ඝකාලීන වැඩපිළිවෙළක් බවත් එම ගමනේ දී විවිධ බාධා එල්ල වූ අතරම ජනාධිපතිවරයා ලෙස සියලූදෙනාගේ සහයෝගයන් එම වැඩපිළිවෙල අද සාර්ථක අවසානයක් කරා මෙහෙයවමින් සිටින බව ද ජනාධිපතිතුමා පැවසීය.
පිබිදෙමු පෙළොන්නරුව දිස්ති‍්‍රක් සංවර්ධන වැඩසටහන යටතේ ලංකාපුර විජිත මහා විද්‍යාලයේ ඉදිකෙරුණු පන්තිකාමර 15කින් යුත් තෙමහල් ගොඩනැඟිල්ල අද පෙරවරුවේ ජනාධිපතිතුමා අතින් සිසු අයිතියට පැවරිණි.
මේ සඳහා වැය කර ඇති මුදල රුපියල් මිලියන 30 කි.
කෂිනි හපුආරච්චි
popular news
-
Deepal Nirosh Saturday, 29 June 2019 03:51 PM
තීරණය නිවැරදියි, හැබැයි දඬුවමට නියමිත සැමටම අනිවාර්ය විය යුතුයි. ජාත්‍යන්තරය හමුවේ නො සැලිය යුතුයි.
Reply : 0 0
Champa Saturday, 29 June 2019 05:41 PM
දීර්ඝ කාලීන වැඩ පිළිවෙලක් කලාලු. අන්තිමට එක මිනිහෙක්වත් මත්ද්‍රවය උවදුරෙන් ගැලව ගන්න බැරි වෙලා. සාර්ථක අවසානය තමයි එල්ලා මැරීම. කීයක් කියල මරන්නද? 4 දෙනෙක් මැරුව කියලා මත්ද්‍රව්‍ය උවදුර නැති වෙනවද? අනිත් එක මත්ද්‍රවය ජාවාරම්කාරයෝ 4 දෙනාද ඉන්නේ? දැන් උන් ඔක්කොම ඉන්නේ හිරේද? අන්තිමට කරන්න හදන්න එකම දේ ලංකාව බෞද්ධ රටක් කියල කියන්න තියෙන සියලු දේ නැති කිරීම. දැනටත් මිනිස්සු මිනිමරණව මදුරුවෝ මරණව වගේ. මේ විදිහට මිනිස්සු එල්ලලා මරනවා දැක්කට පස්සේ දරුවන්ගේ විතරක් නෙමෙයි වැඩිහිටියන්ගේත් හිත් වල තියෙන දයාව අනුකම්පාව නැති වෙලා ගිහින් හිත් දරුණු වෙලා රටේ මීටත් වඩා මිනීමැරුම් වැඩිවෙයි.
Reply : 0 0
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
