චන්දිම කියන අගමැතිගේ කඩු ප්‍රදර්ශනය

පසුගිය දිනවල ආරක්ෂක අංශ විසින් අත්අඩංගුවට ගත් කඩු බෙදා දීමේ වැඩසටහනක් ඉදිරියේ දී  අගමැති රනිල්ගේ ප්‍රධානත්වයෙන්  පැවැත්වුවහොත්  එය පුදුම වීමට කාරණයක් නොවන බව  පාර්ලිමේන්තු මන්ත්‍රී  චන්දිම වීරක්කොඩි මහතා පවසයි.

ඊයේ (30)  දින ගාල්ල ඉමදුව දී පැවති ජනහමුවක දී වැඩිදුරටත්  ඔහු මෙසේ අදහස් දැක්වීය,

“රනිල් වික්‍රමසිංහ මහත්මයා අධ්‍යක්ෂණය  කරමින් තිර පිටපත ලියපු නාට්‍යයක  අවසන් ජවනිකා ටික මේ දිනවල ක්‍රියාත්මක  වෙමින් පවතිනවා. තමන්ගේ පටු දේශපාලන අරමුණු ඉටු කර ගැනීම වෙනුවෙන් මේ අය සිංහල, මුස්ලිම් හා ක්‍රිස්තියානි  ජනතාව නළුවන් කර ගෙන සිටිනවා. දැන් මේ ඡන්ද බලාපොරොත්තුවෙන් පමණක් සිදු කරන මේ වැඩ වල ප්‍රතිඵලය අවසානයේ හොඳ දෙයක් නෙවේ.

මේ වෙලාවේ මුස්ලිම් ජනතාවට ඒත්තු ගන්වන්න හදනවා එජාපය තමයි ඔවුන්ගේ ගැලවුම් කාරයා කියලා. නමුත් බුද්ධිමත් පිරිස දන්නවා මේ කරන්නේ මොකක්ද කියලා. මුස්ලිම් ජනතාව අරක්ෂා කරනවා කියලා උඩින් පෙන්නලා ඔවුන්ගේ ව්‍යාපාර  තනිකරම  නැති කරලා දානවා. ඒ අය දන්නෙත් නෑ ඒ අයට මේ රජය කරන හානිය. ඔවුන් නොදැනම මේ දේශපාලන  නාට්‍යයේ  කොටස් කාරයින් වෙලා.

අද මේ පාස්කු ප්‍රහාරය  සම්බන්ධයෙන් සිදුකරන ලද පරීක්ෂණ සම්බන්ධයෙන් කිසිවෙකු සෑහීමකට පත්වන්නේ නෑ. එහෙම තියෙද්දී නැවත මුස්ලිම් ඇමතිවරුන් දිවුරුම් දීමක් සිදුවෙනවා. මේ ආණ්ඩුව සෑම  අවස්ථාවක දීම කරේ ඔවැනි වැඩ. විරෝධය එන විට ඇමතිවරයා ඉල්ලා අස්වි  නැවත ඊටත් වඩා හොඳ  ඇමතිකමක් දෙනවා. එදා ඉල්ලා අස්වු තිලක් මාරපන, රවී කරුණානායක, මහේෂ්වරන් මේ අය අද ඔක්කොම ඇමතිවරු. මේ රනිල් ගේ තිර පිටපතින් කරන දේශපාලන නාටක සදහා රටේ ජනතාව ඉත්තන් කරන වැඩ කරනවා මිසක් රටට වැඩක් ඇති වැඩක් කරන ආණ්ඩුවක් නෙවේ. 

කෙසේ නමුත් ඉදිරි මහින්ද රාජපක්ෂ මහතා ප්‍රමුඛ  අපේ ආණ්ඩුවක් තුල පාස්කු ප්‍රහාරයට සම්බන්ධ වැරදි කරුවන්ට නිවැරදි නීතිමය ක්‍රමවේදයක්  ඔස්සේ දඬුවම් ලබාදීමට අපි බලාපොරොත්තු වෙනවා” යැයි පැවසීය.