ග්‍රීසියේ සරණාගත කඳවුරු ආශ්‍රිත කොවිඩ් මරණයක්

වසංගතය ආරම්භ වූ දා සිට ග්‍රීසියේ සරණාගත කඳවුරු ආශ්‍රිත පළමු කොවිඩ්-19 මරණය වාර්තා වූ බව එරට රජයේ නිලධාරියෙකු පවසයි.

ඇෆ්ගනිස්ථාන ජාතික 61 හැවිරිදි පුද්ගලයෙක් කොවිඩ්-19 රෝගයෙන් මිය ගොස් ඇති බව රොයිටර් පුවත් සේවය වාර්තා කරයි.

දරුවන් දෙදෙනෙකුගේ පියෙකු වන මෙම පුද්ගලයා මලකාසා සංක්‍රමණික කඳවුරේ ජීවත් වූ අතර ඇතන්ස්හි රෝහලේදී ප්‍රතිකාර ලබමින් සිටියදී මිය ගොස් ඇත.

බලධාරීන් පවසන පරිදි ඔහුගේ සම්බන්ධතා සොයා ගැනීමට බලධාරීන් මේ වනවිටත් සමත්ව ඇති අතර, ඔහු කොපමණ කාලයක් රෝහල් ගතව සිටියාද යන්න පැහැදිලි නොවෙයි.

ඇතන්ස් නගරයට කිලෝමීටර 40ක් පමණ උතුරින් පිහිටි 3,000ක පමණ සරණාගතයන් පිරිසක් සිටින මලකසා කඳවුර සැප්තැම්බර් 7 වැනි දින සිට නව කොරෝනා වෛරසය සඳහා ධනාත්මක පරීක්ෂණවලින් පසුව නිරෝධායනය කර ඇත.