ඇස්ට්‍රාසෙනෙකා ඇමෙරිකාව තුළ අනුමැතිය ඉල්ලීමට යයි

මෙම මාර්තු මස අග හෝ අප්‍රේල් මුලදී හදිසි භාවිතය සඳහා සිය කොවිඩ් -19 එන්නතට අනුමැතිය ලබාදෙන ලෙස එක්සත් ජනපද ආහාර හා ඖෂධ පරිපාලනයෙන් ඉල්ලා සිටීමට ඇස්ට්‍රාසෙනෙකා අපේක්ෂා කරන බව සමාගමේ අඛණ්ඩ සායනික අත්හදා බැලීම් පිළිබඳ දැනුමක් ඇති ආරංචි මාර්ග උපුටා දක්වමින් රොයිටර් පුවත් සේවය වාර්තා කරයි.

සමාගමේ තුන්වැනි අදියර සායනික අත්හදා බැලීම ජනවාරි මාසයේදී බඳවා ගැනීම සම්පූර්ණ කර ඇති බවත්, එයට ස්වෙච්ඡාවෙන් ඉදිරිපත් වූ 32,000කට වැඩි පිරිසක් ඇතුළත් වූ බවත් සඳහන් වේ. ඒ අනුව මෙම පිරිසෙන් අවම වශයෙන් පුද්ගලයන් 150 දෙනෙකුට පමණක් කොවිඩ්-19 ආසාදනය වී ඇති බවත්, එන්නතෙහි කාර්යක්ෂමතාව තීරණය කිරීම සඳහා මෙම දත්ත භාවිත කරන බවත් එම ආරංචි මාර්ග පවසා තිබේ.

ඇස්ට්‍රාසෙනෙකා හි විධායක උප සභාපති සහ සමාගමේ ජෛව ඖෂධ ව්‍යාපාර අංශයේ සභාපති රූඩ් ඩොබර් එක්සත් ජනපද කොංග්‍රස්හි නීති සම්පාදකයන්ට පැවසුවේ අප්‍රේල් මස මුලදී සමාගමට මාත්‍රා දෙකකින් යුතු එන්නතෙහි මාත්‍රාව මිලියන 30ක් ලබාගත හැකි බවත්, අවසරය ලබාදෙන්නේ නම් එය ක්ෂණිකව නිකුත් කළ හැකි බවත්ය. එමෙන්ම අප්‍රේල් මස අවසානයේදී එක්සත් ජනපදයට මාත්‍රා මිලියන 50ක් ලබාගත හැකි බවද ඔහු පවසා තිබේ.