පරිසරයට නොසැළකිමේ සෘජු ප්‍රතිඵල අත්විදිනවා

පරිසරය නොතකා හැරීමේ සහ සොබාදහම පිළිබඳ සංවේදීභාවයෙන් තොරව දිවි ගෙවීමේ සෘජු ඛේදනීය ප්‍රතිඵල වත්මන් ජනතාව භුක්ති වදිමින් සිටින බව අග්‍රාමාත්‍ය රනිල් වික්‍රමසිංහ මහතා පවසයි.

හෙටට යෙදෙන ලෝක පරිසර දිනය වෙනුවෙන් නිවේදනයක් නිකුත් කරමින් ඔහු මේ බව සඳහන් කරයි. එසේම ජෛව විවිධත්වයේ නිජබිමක්ව පැවති ශ්‍රී ලංකාව එම විවිධත්වයේ සමෘද්ධිමත් බව, අගය සහ සෞන්දර්යය අහිමි කරගනිමින් සිටීම ශෝකයට කරුණක් බවත් ඔහු සඳහන් කරයි.

 අසීමිත තෘෂ්ණාවෙන් සහ ආත්මාර්ථයෙන් සිදුකරන මිනිස් ක්‍රියාකාරකම් හේතුවෙන් සොබාදහමේ සමතුලිත බව ගිළිහෙමින් සමස්ත පැවැත්ම බරපතල අර්බුදයක් බවට පත්කොට ඇති බවත් අග්‍රාමාත්‍යවරයාගේ නිවේදනයේ සඳහන් වෙයි.

“ පරිසරය සමඟ ඒකාත්මිකව දිවි ගෙවූ අපගේ ජීවන රටාවන් වෙනස් වීම මෙන්ම වෙනස්වන ලෝකය තුළ දියූණුව හඹා යාමේදී සොබාදහම නොතකා හැරීමද මෙම අවාසනාවන්ත තත්ත්වය උදාවීමට හේතු වී ඇති බව පැහැදිලිය. මෙවැනි ඛේදනීය තත්ත්වයන් පාලනය කිරීම සහ පරිසරය සුරැකීම සම්බන්ධව රජයට විශේෂ වගකීමක් පැවරෙන අතරම ඒ සඳහා සමස්ත ජනතාවගේ සහයෝගය අත්‍යවශ්‍ය වේ.      

මානව පැවැත්මට, විශ්වයේ පැවැත්මට පරිසර සංරක්ෂණයේ ඇති වැදගත්කම පිළිබඳ මනා අවබෝධයෙන්, වගකීමෙන් අද දවසේ අප කටයුතු නොකරන්නේ නම් එය ඉතාම අහිතකර ලෙස සහ විනාශකාරී ලෙස අපගේ හෙට දවස ආක්‍රමණය කරනු ඇත.    

ලෝක පරිසර දිනය සමරන අවස්ථාවේ සොබාදහමට දක්වන ආදරය, ගෞරවය සහ සැලකීම දෛනික දිවි පෙවෙතේ අංගයක් ලෙස වැඩි වර්ධනය කරගන්නට සමස්ත ශ්‍රී ලාංකික ජනතාවට ඇරයුම් කරමි. පරිසර හිතවාදී බව දිනයකට පමණක් සීමා නොකොට ජීවන චර්යාවක් බවට පත්කරගැනීම අප සැමගේ වගකීම වේ. “ යනුවෙන්ද ඔහු නිකුත් කළ නිවේදනයේ වැඩිදුරටත් දැක්වෙයි.