ජනපතිගේ තිරුපති සංචාරයේදී ආරක්ෂක හිදැසක්

ජනපති මෛත්‍රීපාල සිරිසේන මහතා ඉන්දියාවේ තිරුමාලාහි කළ තිරුපති දේවාල වන්දනාවේදී ඔහුගේ ආරක්ෂාව සම්බන්ධයෙන් ගැටලු මතුව ඇති බව ඉන්දීය මාධ්‍ය වාර්තා කරයි. මෙහිදී ජනපති මෛත්‍රීපාල සිරිසේන මහතා ගමන් ගත් මෝටර් රථයේ රියඳුරු නොමැතිව ඔහුට එක් අවස්ථාවකදී විනාඩි 12ක පමණ කාලයක් බලා සිටීමට සිදුව ඇති බවද ඉන්දීය මාධ්‍ය සඳහන් කරයි.

කෙසේ වෙතත් ජනපතිවරයාගේ ආරක්ෂාව බිඳ වැටීම වෙනුවෙන් මේ වන විට පරීක්ෂණයක්ද ආරම්භ කර තිබෙන බව ඉන්දීය මාධ්‍ය වාර්තා කරයි. ජනපතිවරයා පෙරේදා අලුයම ආගමික වතාවත් සඳහා තිරුමාලා වෙත පැමිණි අවස්ථාවේදී මෙම ගැටලු පැන නැග තිබේ. 

 ආගමික වතාවත් වලින් පසුව නැවතත් සිය මෝටර් රථය වෙත ජනපතිවරයා පැමිණි අවස්ථාවේදී එහි රියදුරු නොසිටීම හේතුවෙන් ජනපතිවරයා හා ඔහුගේ බිරිද ජයන්ති සිරිසේන මහත්මිය විනාඩි 12ක පමණ කාලයක් වාහනය තුළට වී සිට ඇත. කෙසේ වෙතත් මෝටර් රථයේ රියදුරාද දේවාලයේ ආගමික වතාවත් සඳහා එක්ව තිබෙන බවට තොරතුරු වාර්තා වෙන බවත් ඉන්දීය මාධ්‍ය පවසයි.