ජනතාවගේ සාක්කු පුරවනවා - අගමැති

ජාතික ආණ්ඩුවක් සැකසුවේ සිය සාක්කු පුරවාගැනීමට නොව ජනතාවගේ සාක්කු පිරවීමට බව අග්‍රාමාත්‍ය රනිල් වික්‍රමසිංහ මහතා පැවසීය. 

එසේම චීනය සමග සහයෝගයෙන් කටයුතු කිරීමට එකඟව තිබෙන බවත්, හම්බන්තොට වරාය හා මත්තල ගුවන්තොටුපොළද සංවර්ධනය කරන බවත් බදුල්ලේ පැවැති උත්සවයක් අමතමින් අග්‍රාමාත්‍යවරයා අද (03දා) කියා සිටියේය.

“අපිබාරගත්තේ ලෝකයේ ලොකුම පිහිනුම් තටාකයයි. හම්බන්තොට එම පිහිනුම් තටාකය ඉදිකර තිබුණා. තව වසර දෙකක් යනවිට එය නැව්වලින් පිරවීමට මා කටයුතු කරනවා. එහි වරායක් පමණක් නොව, නැව් අලුත්වැඩියා කිරීම සඳහා නැව් තටාකාංගණයක් මෙන්ම අලුතින් නැව් නිෂ්පාදනය කිරීමටත්, චීනය සමග සහයෝගයෙන් කටයුතු කිරිමට අප එකඟ වී සිටිනවා. දවසට එක් ගුවන් යානයක් පැමිණෙන මත්තල ගුවන්තොටුපලට දවසට ගුවන් යානා පනහක්වත් එන වැඩසටහනක් ක්‍රියාත්මක කිරිමට පියවර ගෙන තිබෙනවා.

අපි බලයට පැමිණියේ අපේ සාක්කු පුරවාගන්න නොවෙයි. ජනතාවගේ සාක්කු පුරවන්නයි. අපි ආවේ අපට මාළිගා හදාගන්න නොවෙයි, ජනතාවට නිවාස ලබාදීමටයි. අපි ආවේ අනුන්ගේ ඉඩම් අල්ලා ගැනීමට නොවෙයි, ඔබට ඉඩම් අයිතිය ලබා දීමටයි. අපි ආවේ දේශපාලන හෙංචයියන්ට වැඩ කරන්න නොවෙයි. තරුණ තරුණියන්ට රැකියා ලබා දී ආදායමක් උත්පාදනය කිරිමටයි” යනුවෙන්ද ඔහු සඳහන් කළේය.