තවමත් පැමිණිල්ලක් ඉදිරිපත් වෙලා නෑ, පරීක්ෂණයක් පවත්වන්නෙත් නෑ

බාල ගල්අඟුරු ගෙන්වීම නිසා ලංකා විදුලිබල මණ්ඩලයට සිදුවූ බව පැවසෙන රුපියල් කෝටි එකසිය පනහකට අධික වංචාවක් පිළිබඳව අපරාධ පරීක්ෂණ දෙපාර්තමේන්තුවට ඊෙය් (27දා) දිනය වනවිටත් පැමිණිල්ලක් ලැබී නොමැති බව හා අපරාධ පරීක්ෂණ දෙපාර්තමේන්තුව විසින් එවැනි පරීක්ෂණයක් සිදුනොකරන බව අනාවරණය වේ.

මෙවැනි පැමිණිල්ලක් ලැබී තිබේදැයි 'අද' පුවත්පත පොලිස් මූලස්ථානයෙන් විමසූ විට එහි උසස් පොලිස් නිලධාරියෙකු සඳහන් කළේ, බාල ගල්අඟුරු ගෙන්වීමේදී සිදුවූ වංචාවක් පිළිබඳ කිසිදු පරීක්ෂණයක් මෙතෙක් නොපවත්වන බවයි. 

මෙතෙක් එවැනි පැමිණිල්ලක් අපරාධ පරීක්ෂණ දෙපාර්තමේන්තුවට ලැබී නොමැති බවද එම නිලධාරියා සඳහන් කළේය.

මේ අතර, 2012 වසරේදී නොරොච්චෝලේ ගල්අඟුරු බලාගාරයට අවශ්‍ය ගල්අඟුරු ගෙන්වීමේදී ලංකා විදුලිබල මණ්ඩලයට රුපියල් එකසිය පනස් කෝටි හැත්තෑ ලක්ෂ හතළිස් හතරදහසක අලාභයක් සිදුව තිබෙන බව විදුලි බල හා බලශක්ති ඇමතිනී පවිත්‍රා දේවි වන්නිආරච්චි මහත්මිය පසුගිය 23 වැනිදා පාර්ලිමේන්තුවේදී හෙළි කළාය.

2012 වසරේ ජුනි මස 29 වැනිදා එළඹි ගිවිසුමකට අනුව ලබාගත් ගල්අඟුරු දහනය කර විදුලිය උත්පාදනය කිරීම නිසා රුපියල් අසූපන්කෝටි විසිහත් ලක්ෂ හැට අටදහසක අලාභයක් සිදුව තිබෙන බවත්, ගිවිසුම් ප්‍රකාරව එකී මිලට සහ එකී ප්‍රමිතියට සැපයීමට එකඟ වූ ගල්අඟුරු මෙට්‍රික්ටොන් 29,896 ක් අඩුවෙන් සැපයීම නිසා රුපියල් හැටපන් කෝටි හතළිස් දෙලක්ෂ හැත්තෑ හයදහස් එකසීය දහයක පාඩුවක් සිදුව තිබෙන බවද අමාත්‍යවරිය එහිදී පවසා සිටියාය.

මේ අනුව ලංකා විදුලිබල මණ්ඩලය සිදුවී තිබෙන පාඩුව එකසීය පනස් කෝටි හැත්තෑ ලක්ෂ හතළිස් හතර දහස් එකසීය දාසයක් බවද අමාත්‍යවරිය පාර්ලිමේන්තුවේදී වැඩිදුරටත් හෙළිකළාය. මෙම හෙළි කිරීම සම්බන්ධයෙන් හිටපු විදුලිබල හා බලශක්ති අමාත්‍ය පාඨලී චම්පික රණවක මහතා පසුගිය සිකුරාදා (24 වැනිදා) මාධ්‍ය හමුවක් පවත්වමින් සඳහන් කළේ ගල් අඟුරු ගෙන්වීමේදී කිසියම් අක්‍රමිකතාවක් සිදුවී ඇත්නම් ඒ පිළිබඳ වහා පරීක්ෂණයක් සිදුකර වගකිවයුත්තන්ට දඬුවම් ලබා දිය යුතු බවයි.