උතුරු පළාතේ තරමක් වැසි - රට පුරා හා මුහුදේ තද සුළං

දිවයින හරහා සහ දිවයින අවට මුහුදු ප්‍රදේශවල විටින්විට හමන තරමක් තද සුළං (පැ.කි.මී. 50-55 පමණ) තවදුරටත් බලාපොරොත්තු වන බව කාලගුණ විද්‍යා දෙපාර්තමේන්තුව පවසයි.

හෙට දිනයේ බස්නාහිර, සබරගමුව සහ මධ්‍යම පළාත්වලත්, ගාල්ල සහ කුරුණෑගල දිස්ත්‍රික්කවලත් තැනින් තැන සිහින් වැසි ඇති විය හැක. 

උතුර සහ ඌව පළාත්වලත්, මඩකළපුව  සහ අම්පාර දිස්ත්‍රික්කවලත් ස්ථාන ස්වල්පයක සවස 2.00 න් පමණ පසු ගිගුරුම් සහිත වැසි  ඇති විය හැක. 

ගිගුරුම් සහිත වැසි ඇති වන විට එම ප්‍රදේශවල තාවකාලිකව තද සුළං ඇති විය හැක. අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස එම දෙපාර්තමේන්තුව ජනතාවගෙන් කාරුණිකව ඉල්ලා සිටිනු ලැබේ.