WHO සතිය අවසානයේදී සීනොෆාම් එන්නත පිළිබඳ තීරණය ප්‍රකාශ කරනවාලු

චීනයේ නිෂ්පාදිත සීනොෆාම් කොවිඩ්-19 මර්දන එන්නත හදිසි භාවිතය සඳහා ලැයිස්තුගත කරන්නේද යන්න පිළිබඳව මෙම සතිය අවසානයේදී තීරණය කරන බව ලෝක සෞඛ්‍ය සංවිධානය පවසයි.

ලෝක සෞඛ්‍ය සංවිධානයේ තාක්ෂණික උපදේශක කණ්ඩායම ඊයේ (26දා) සීනොෆාම් එන්නත පිළිබඳ සමාලෝචනය දියත් කළ අතර, එය ගෝලීය නියාමකයෙකු විසින් සමාලෝචනය කරන ලද පළමු වැනි චීන එන්නත බවට පත්විය.

"මෙම සතිය අවසන් වීමට පෙර සීනොෆාම් ගැන තීරණයක් ගනු ඇතැයි අප අපේක්ෂා කරනවා" යැයි ලෝක සෞඛ්‍ය සංවිධානයේ ප්‍රතිකාර, එන්නත් සහ ඖෂධ ප්‍රවේශය සඳහා සහකාර අධ්‍යක්ෂ ජනරාල් මාරියන්ජෙලා සිමාවෝ පැවසීය.

මැයි 3දා සිට සමාලෝචනයට භාජනය වන සීනොවැක් (කොරෝනාවැක්) පිළිබඳ තීරණය ලබන සතිය අවසන් වනවිට ලැබෙනු ඇති බවද ඇය පැවසුවාය.

චීනය, පාකිස්තානය සහ එක්සත් අරාබි එමීර් රාජ්‍යය තුළ සීනොෆාම් එන්නත දැනටමත් අනුමත කළද, එය මෙතෙක් බටහිර රටවල පුළුල් ලෙස බෙදාහැර නැත. ලෝක සෞඛ්‍ය සංවිධානයේ හරිත එළියත් සමග, එහි ගෝලීය ව්‍යාප්තිය දියත් කිරීමටත්, කොරෝනා වෛරසය පැරදවීමේ සටනේදී තම එන්නත්වල ක්‍රියාකාරීත්වය පිලිබිඹු කිරීමට හැකිවනු ඇති බවත් චීනය කියයි.

මෙම අනුමැතිය ලබාදීම චීනයේ ජෛව තාක්‍ෂණ කර්මාන්තයට විශාල ජයග්‍රහණයක් සනිටුහන් කරයි. ලෝක සෞඛ්‍ය සංවිධානය මේ වනවිට එන්නත් තුනක් හදිසි භාවිතය සඳහා ලැයිස්තුගත කර ඇති අතර, ඒවා ෆයිසර්-බයෝඑන්ටෙක්, ජොන්සන් සහ ජොන්සන් සහ ඇස්ට්‍රාසෙනෙකා (දකුණු කොරියාවේ එස්.කේ.බියෝ සහ ඉන්දියාවේ සේරම් ආයතනය විසින් නිපදවන එන්නත් ද ඇතුළුව) යන එන්නත්ය. එමෙන්ම මොඩෙර්නා එන්නතද මේ වනවිට හදිසි භාවිතය සඳහා අයදුම් කර තිබේ.

සීනොෆාම් එන්නතෙහි සවිස්තරාත්මක දත්ත ප්‍රසිද්ධියේ ලබා දී නොමැති නමුත් තුන්වැනි අදියර අත්හදා බැලීම්වලින් පෙන්නුම් කළේ එන්නත 79.34%ක් ඵලදායී බව යැයි එම සමාගම පවසයි.

එසේම හදිසි භාවිත ලැයිස්තුගත කිරීමක් ලබාදෙන්නේ නම්, සීනොෆාම් එන්නත් WHO ප්‍රමුඛ COVAX පහසුකමට එකතු කළ හැකිවීමද විශේෂත්වයකි.