Google Stamp සමගින් ඔබේ කථාව පවසන්න

ෆේස්බුක් සහ ඉන්ස්ටග්‍රෑම් වැනි සමාජ ජාල සේවාවන් තුළ අලුතෙන්ම හඳුන්වාදුන් විශේෂාංගයක් වූයේ "Stories" මාධ්‍යයයි. ඒ ඡායාරූපයක් හරහා ඔබේ ජීවිතයේ එදිනෙදා සිදුවීමක් මිතුරන්ට පැවසීමේ නවතම යාන්ත්‍රණයයි.

ඇතැමෙකු ඒ සම්බන්ධයෙන් දක්වන ආකල්ප එතරම් සුබවාදී නැතත් එය නුදුරු අනාගතයේදීම තරමක් දුරට හෝ සුබවාදීව පැතිර යනු ඇතැයි අනාවැකි පැවසිය හැක. එනිසා එම අවශ්‍යතාවය වටහා ගන්නා ගූගල් සමාගමද එයට සරිලන නව සේවාවක් තමන් හරහා ලබාදීමට සූදානම්ව සිටිනා බව වාර්තා වේ.

එහෙත් ඔවුන් එයට "Stories" යන නමම තබනවා වෙනුවට, එය “Stamp" ලෙසින් හැඳින්වීමට සූදානම් වී සිටී. එහි විශේෂත්වය වඩා නිර්මාණශීලී පුද්ගල කතාන්තරයක් වඩාත් සාර්ථකව ඉදිරිපත් කිරීමට හැකියාව ලැබීමයි.

“Stamp" යන නම සැකසෙන්නේද සුවිශේෂ ආකාරයකටයි. “Stories" යන්නෙන් St යන මූලික අකුරු දෙකත්, ඉතිරි අකුරු තුන වන AMP යන්නෙන් Accelerated Mobile Pages යන්නත් කියවෙන ලෙස ඔවුන් විසින් මෙම නම සකස් කොට ඇත.

ඉන්ස්ටග්‍රම් සහ ෆේස්බුක් මෙන්ම ස්නැප්චැට් සමාජ ජාලයෙන්ද මෙවැනි සේවයක් “Discover" ලෙසින් හඳුන්වා දී තිබේ. ඒ අනුව කෙටි වදන්, ඡායාරූප සහ වීඩියෝ ඇසුරු කරගෙන ඔබට සිය කතාව පැවසීමේ හැකියාව ඇත. මෙම ආකෘතියම ගූග්ල් විසින්ද අනුහුරු කරගනු ඇතැයි විශ්වාස කළ හැක.