චයිනා එක්ස්පෝ හරහා නව භාණ්ඩ 480ක් වෙළදපොළට

චීනයේ නවවැනි ජාත්‍යන්තර ආනයන ප්‍රදර්ශනය (China International Import Expo – CIIE) නොවැම්බර් 05 සිට 10 දක්වා ෂැංහයි නගරයේදී පැවැත්වේ.

මෙවර ප්‍රදර්ශනයේදී ලෝකයට, ආසියාවට හෝ චීනයට ප්‍රථම වරට හඳුන්වා දෙන නියෝජිත නිෂ්පාදන 480කට අධික සංඛ්‍යාවක් ප්‍රදර්ශනය කෙරේ. එය මෙතෙක් වාර්තා වූ ඉහළම සංඛ්‍යාවයි. එමෙන්ම, ප්‍රථම වරට හඳුන්වා දෙන ආනයනික පාරිභෝගික භාණ්ඩ සඳහා ෂැංහයි නගරය හඳුන්වා දී ඇති පුරෝගාමී පහසුකම් සැලසීමේ ක්‍රියාමාර්ග යටතේ භාණ්ඩ නිෂ්කාශනය සඳහා ගත වූ අවම වශයෙන් දින හතක කාලය එදිනම නිෂ්කාශනය කර මුදාහැරීම දක්වා අඩු කර තිබේ.

ඒ අනුව, ප්‍රදර්ශන භාණ්ඩයක් වෙළෙඳපොළේ අලෙවි වන නිෂ්පාදනයක් බවට පත්වීම සඳහා මාස ගණනක් බලා සිටීමට සිදු වූ කාලය වෙනුවට, එම ස්ථානයේදීම මිලදී ගැනීමේ අවස්ථාව උදා වී තිබේ. එබැවින් CIIE ප්‍රදර්ශනයක සාර්ථකත්වය මැනීමේදී එයට පැමිණෙන ජනකාය පිළිබඳව පමණක් නොව, නව නිෂ්පාදන සැබෑ පාරිභෝගික පරිභෝජනයක් බවට පරිවර්තනය කිරීමේ හැකියාව පිළිබඳව ද අවධානය යොමු කෙරේ.

නවවැනි CIIE ප්‍රදර්ශනය සඳහා රටවල්, කලාප සහ සංවිධාන 162ක් සහභාගි වේ. විදේශීය ප්‍රදර්ශකයන් 4,142ක් මෙවර ඊට එක්වන අතර, වාර්තාගත ලෙස වර්ග මීටර් 440,000 ඉක්මවන ප්‍රදර්ශන භූමි ප්‍රමාණයක් ඒ සඳහා වෙන් කර තිබේ. Fortune Global 500 ලැයිස්තුවට අයත් සමාගම් සහ ප්‍රමුඛ පෙළේ කර්මාන්ත සමාගම් 300කට අධික සංඛ්‍යාවක් ද ඊට සහභාගි වේ.

මෙවර ප්‍රථම වරට හඳුන්වා දෙන නියෝජිත නිෂ්පාදන අතර මොඩියුලර් ආකාරයේ ලැපරොස්කොපික් ශල්‍ය රොබෝ යන්ත්‍රයක්, අංශක 360ක කොක්ලියර් ඉම්ප්ලාන්ට් උපකරණයක් සහ 6G සන්නිවේදන පර්යන්තයක මූලාකෘතියක් ද ඇතුළත් වේ. මෙම නිෂ්පාදන වෛද්‍ය උපකරණ, සන්නිවේදන තාක්ෂණය සහ කෘත්‍රිම බුද්ධිය (AI) ඇතුළු ක්ෂේත්‍ර ආවරණය කරයි.

2026–2030 කාලය සඳහා වන චීනයේ 15 වැනි පස් අවුරුදු සැලැස්ම තුළ ප්‍රථම වරට 'නව නිෂ්පාදන හඳුන්වාදීමේ ආර්ථිකය' (Debut Economy) යන සංකල්පය ඇතුළත් කර තිබේ.

2018 වසරේදී පළමු CIIE ප්‍රදර්ශනය පැවැත්වූ අවස්ථාවේ සිට ෂැංහයි නගරය ලෝකයේ නව නිෂ්පාදන හඳුන්වාදීමේ ප්‍රධාන මධ්‍යස්ථානයක් ලෙස තම අනන්‍යතාව ගොඩනඟා ගෙන ඇත. මේ දක්වා පැවති ප්‍රදර්ශන වාර අට තුළ නව නිෂ්පාදන, තාක්ෂණයන් සහ සේවාවන් 3,400කට අධික සංඛ්‍යාවක් හඳුන්වා දී තිබේ.

සමාගම් චීනය තම නව නිෂ්පාදන අත්හදා බැලීමේ ප්‍රධාන වෙළෙඳපොළක් ලෙස සලකයි. ලෝකයේ විශාලතම පාරිභෝගික වෙළෙඳපොළට නව නිෂ්පාදනයක් ප්‍රථම වරට හඳුන්වාදීම යනු ක්ෂණික අවධානයට සහ විමර්ශනයට ලක්වීම මෙන්ම පාරිභෝගිකයන්ගේ මතකයේ සහ වෙළෙඳ රාක්කවල ඉදිරියෙන් ස්ථානයක් හිමි කර ගැනීමේ අවස්ථාව ද වේ.

චීන වෙළෙඳපොළට පළමුවෙන්ම තම නිෂ්පාදනය හඳුන්වා දෙන සමාගමට එම වෙළෙඳපොළේ වර්ධනය සහ නවීකරණය තුළින් ලැබෙන ප්‍රතිලාභ අත්කර ගැනීමේ වැඩි අවස්ථාවක් හිමි වේ.

එහෙත් නව නිෂ්පාදනයක් හඳුන්වාදීම යනු ආරම්භයක් පමණි. ප්‍රදර්ශන ශාලාව තුළ ඇතිවන උනන්දුව සැබෑ අලෙවියක් බවට පත් නොවන්නේ නම් එහි වාණිජමය වටිනාකම ක්‍රමයෙන් අඩු වේ.

භාණ්ඩ රේගු නිෂ්කාශනය කිරීමේ වේගය සහ වෙළෙඳපොළට හඳුන්වාදීමේ ක්‍රියාවලියේ පුරෝකථනය කළ හැකි බව, නිෂ්පාදනයක් වෙළෙඳපොළට පිවිසිය යුතු සුදුසුම කාලය තීරණය කරයි. අතීතයේදී ප්‍රථම වරට ආනයනය කරන භාණ්ඩ සඳහා පරීක්ෂණ, ලියාපදිංචි කිරීම් සහ ලේබල් කිරීමේ කටයුතු වෙනුවෙන් සති ගණනක් ගත විය. එම ප්‍රමාදයන් හේතුවෙන් බොහෝ නිෂ්පාදනවලට සුදුසුම අලෙවි කාලය අහිමි විය.

ඒ අනුව, නව නිෂ්පාදන හඳුන්වාදීමේ ආර්ථිකය ගොඩනැගෙන්නේ ඒවා ප්‍රදර්ශනය කිරීමෙන් පමණක් නොව, වෙළෙඳපොළ තුළ අලෙවි කිරීමෙනි. එහිදී තීරණාත්මක සාධකය වන්නේ වෙළෙඳපොළට පිවිසීමේ වේගයයි.

ෂැංහයි නගරය හඳුන්වා දී ඇති '6+365' වසර පුරා ක්‍රියාත්මක වන යාන්ත්‍රණය මඟින් ප්‍රදර්ශනය අවසන් වීමෙන් පසුව ද එහි ප්‍රතිලාභ අඛණ්ඩව පවත්වාගෙන යයි.

Hongqiao Import Commodity Exhibition Center තුළ රටවල් 120කට අධික සංඛ්‍යාවක වෙළෙඳ නාම 6,000කට වැඩි ප්‍රමාණයක් සහ CIIE ප්‍රදර්ශනය වෙනුවෙන්ම නිෂ්පාදනය කරන ලද විශේෂිත භාණ්ඩ 85,000කට අධික සංඛ්‍යාවක් එක්රැස් කර තිබේ.

එමෙන්ම Greenland Global Commodity Trading Hub මඟින් විදේශීය වෙළෙඳ නාම 200කට අධික සංඛ්‍යාවකට චීනයේ සිය පළමු වෙළෙඳසල් ආරම්භ කිරීමට සහාය වී ඇත.

නව නිෂ්පාදන හඳුන්වාදීමේ ආර්ථිකය වෙනුවෙන් ක්‍රියාත්මක ප්‍රතිපත්ති ද 1.0 අනුවාදයේ සිට 4.0 අනුවාදය දක්වා සංවර්ධනය වී ඇති අතර, එමඟින් ප්‍රමුඛ පෙළේ වෙළෙඳසල් 1,700කට අධික සංඛ්‍යාවක් ආකර්ෂණය කර ගැනීමට හැකි වී තිබේ.

ඒ අනුව, ආයතනික පහසුකම් සහ ප්‍රතිපත්තිමය සහාය මඟින් ප්‍රදර්ශනය පැවැත්වෙන දින හයේ උනන්දුව දින 365 පුරා පවතින වෙළෙඳපොළ ක්‍රියාකාරීත්වයක් බවට පරිවර්තනය කරයි. මේ මඟින් CIIE ප්‍රදර්ශනය අඛණ්ඩව ක්‍රියාත්මක වන ආනයන පද්ධතියක් බවට පත්වේ.

ෂැංහයි නගරය විසින් Lujiazui හි Lu-link සහ Zhangyuan වැනි ස්ථාන දෙවන ප්‍රදර්ශන මධ්‍යස්ථාන ලෙස යොදා ගනිමින් නව නිෂ්පාදන හඳුන්වාදීමේ අවස්ථා සංවිධානය කර ඇත.

2026 ගුණාත්මක පාරිභෝගික පරිභෝජන මාසික වැඩසටහන (2026 Quality Consumption Month) සහ ප්‍රදර්ශන සැණකෙළියක් ද ඊට සමගාමීව ක්‍රියාත්මක වේ. එමෙන්ම වෙළෙඳසල් 5,000කට අධික සංඛ්‍යාවක් සම්බන්ධ කරමින් ප්‍රවේශපත්‍ර ප්‍රවර්ධන වැඩසටහන් ද ක්‍රියාත්මක කර තිබේ.

චීන භාෂා ලේබල් කිරීමේ අවශ්‍යතාවකින් තොරව කුඩා ප්‍රමාණයේ භාණ්ඩ එම ස්ථානයේදීම අත්හදා බැලීමේ අලෙවියක් ලෙස විකිණීමට ද රේගු බලධාරීන් අවසර ලබා දී ඇත.

ඒ අනුව, නරඹන්නන්ට තමන් කැමති නිෂ්පාදන එම අවස්ථාවේදීම මිලදී ගැනීමට හැකි වී තිබේ. ප්‍රදර්ශන ශාලාවලින් පිටත සිදුවන අලෙවි කටයුතු ද ඒ සමඟම සැබෑ වෙළෙඳ ගනුදෙනු බවට පත්ව තිබේ.

මෙහි පොදු ලක්ෂණය වන්නේ වෙළෙඳ ගනුදෙනු සිදු කිරීමට තවදුරටත් බලා සිටීමට අවශ්‍ය නොවීමයි.

වෙළෙඳ ප්‍රදර්ශනයක් යනු ගැනුම්කරුවන් සහ විකුණුම්කරුවන් එකිනෙකා සම්බන්ධ කරන ගනුදෙනු යාන්ත්‍රණයකි. එහි වටිනාකම තීරණය වන්නේ එම සම්බන්ධතා කෙතරම් කාර්යක්ෂමව ගනුදෙනු බවට පරිවර්තනය කරන්නේ ද යන්න මතය.

අතීතයේදී ප්‍රදර්ශනය කරන ලද භාණ්ඩයක් වෙළෙඳපොළේ නිෂ්පාදනයක් බවට පත්වීමට මාස ගණනක් ගත විය. එහෙත් අද වන විට එදිනම රේගු නිෂ්කාශනය සහ එම ස්ථානයේදීම සිදු කරන අලෙවි කටයුතු හේතුවෙන් භාණ්ඩ නරඹන පාරිභෝගිකයන්ට ඒවා මිලදී ගැනීමේ අවස්ථාව උදා වී තිබේ.

 අටවැනි CIIE ප්‍රදර්ශනයේදී වාර්ෂික පදනම මත ගණනය කළ අපේක්ෂිත ගනුදෙනු වටිනාකම ඇමරිකානු ඩොලර් බිලියන 83.49ක් ලෙස වාර්තා විය. එය පෙර වසරට සාපේක්ෂව සියයට 4.4ක වර්ධනයක් වන අතර, මෙතෙක් වාර්තා වූ ඉහළම අගය ද වේ.

ප්‍රදර්ශන වාර අට තුළ ඇති කරගත් සමස්ත ගනුදෙනු වටිනාකම ඇමරිකානු ඩොලර් බිලියන 500 ඉක්මවා තිබේ.

ඒ අනුව, CIIE ප්‍රදර්ශනයේ ආකර්ෂණීයත්වය තීරණය වන්නේ ප්‍රදර්ශන ශාලා තුළ එක්රැස් වන ජනකාය හෝ ප්‍රථම වරට හඳුන්වා දෙන නිෂ්පාදන සංඛ්‍යාව මත පමණක් නොවේ. එමඟින් නිර්මාණය කරන සැබෑ පාරිභෝගික පරිභෝජනය සහ ආර්ථික ක්‍රියාකාරීත්වය මතය.

නව නිෂ්පාදන හඳුන්වාදීමේ ආර්ථිකයේ මූලික අරමුණ වන්නේ 'නවතාවය' සැබෑ 'මිලදී ගැනීම්' බවට පරිවර්තනය කිරීමයි.

නිෂ්පාදන වෙළෙඳපොළට වඩාත් වේගයෙන් පැමිණීම, වෙළෙඳපොළේ ප්‍රතිචාර වඩාත් කඩිනමින් ලැබීම සහ පාරිභෝගික පරිභෝජනයේ ජීවය අවදි කිරීම එහි ප්‍රධාන ප්‍රතිඵල වේ.

ප්‍රදර්ශනයකදී ඉදිරිපත් කරන භාණ්ඩයක් වෙළෙඳපොළේ අලෙවි වන නිෂ්පාදනයක් බවට පත්වන වේගය, චීන වෙළෙඳපොළේ සජීවීභාවය මනින එක් දර්ශකයක් බවට පත්ව තිබේ.

එදිනම රේගු නිෂ්කාශනය කර භාණ්ඩ මුදාහැරීම සහ එම ස්ථානයේදීම ඇණවුම් ලබා ගැනීම පිටුපස ඇත්තේ විවෘත ආර්ථික ප්‍රතිපත්ති සහ පාරිභෝගික වෙළෙඳපොළේ විභවයන් එකිනෙක ශක්තිමත් කරන ධනාත්මක චක්‍රයකි.

කර්තෘ: Liu Chunsheng