උතුර ජලයෙන් යටවෙයි

උතුරේ ජලාශ බොහොමයක් වාන් දැමීම හේතුවෙන් උතුරු පළාතේ ප්‍රදේශ රැසක් ජලයෙන් යට වී ඇති බවත්, යාපනය හා කිලිනොච්චි දිස්ත්‍රික්කවලට වැඩි වශයෙන් බලපෑම් එල්ල වී ඇති බවත් යුද හමුදාව සඳහන් කරයි.

කිලිනොච්චිය ආරක්ෂක සේනා ආඥාපති මේජර් ජෙනරාල් අමල් කරුණාසේකර මහතාගේ උපදෙස් මත, ගංවතුර තත්ත්වයෙන් පීඩාවට පත්ව සිටින කිලිනොච්චි දිස්ත්‍රික්කයේ ජනතාවගේ ජීවිත ආරක්ෂක කටයුතු හා පහසුකම් සැලසීම යුද හමුදා සෙබළුන් 1,000 කට ආසන්න පිරිසක් යොදවා ඇති බව කිලිනොච්චිය ආරක්ෂක සේනා මූලස්ථානය සඳහන් කරයි.

ගංවතුර තත්ත්වයෙන් කිලිනොච්චියේ වැඩිම බලපෑමක් එල්ල වී ඇති කරච්චි, වඩ්ඩකච්චි, ධර්මපුරම්, පරන්තන්, අක්කරායන්කුලම්, පුනරීන්, මුක්කම්පන් හා ඉරණමඩු යන ප්‍රදේශවල ජනතාවට සහන සැලසීමටද කිලිනොච්චි ආරක්ෂක සේනා මූලස්ථානය පියවර ගෙන ඇත.