ශ්‍රී ලංකන් ද.ආසියාවේ විශිෂ්ට ගුවන් සේවය ලෙස පිදුම් ලබයි

ශ්‍රී ලංකන් ගුවන් සමාගම කලාපීය ගුවන් සේවා ක්ෂේත්‍රයේ %ප්‍රමුඛතම ජාත්‍යන්තර ගුවන් සේවය^ ලෙස 2017 වසරේ දෙවැනි වාර්ෂික දකුණු ආසියානු සංචාරක සම්මාන උලෙළෙහිදී පසුගියදා පැසසුම් ලබා තිබේ. රටවල් ගණනාවකට අයත් අනෙකුත් ගුවන් සේවා අභිභවා යමින් ශ්‍රී ලංකන් ව්‍යාපාරික පන්තිය කලාපයේ සමස්ත ගුවන් සේවා මැදිරි පන්ති අතරින් %විශිෂ්ටතම පංතිය^ ලෙස සම්මානයට පාත්‍ර වූ බවද එම ගුවන් සමාගම නිවේදනය කරයි.

මෙම සම්මාන උළෙල මාලදිවයිනට අයත් ගැන් දිවයිනේ අද්දු නගරයේ පිහිටි Equator Village නිවාඩු නිකේතනයේදී පසුගිය ඔක්තෝබර් 28දා පවත්වා තිබේ.

සමස්ත  සංචාරක  ක්ෂේත්ත්‍රයම ආවරණය කරමින්, එනම් සම්පූර්ණ සේවා සහිත ගුවන් සේවා, පිරිමැසුම් ගුවන් සේවා, හෝටල්, විවිධ ආකාරයේ නිකේතන, සම්මන්ත්‍රණ පහසුකම්, සංචාරක ඒජන්සි, සංචාර මෙහෙයවන්නන්, ත්‍රාසජනක සංචාරක ක්ෂේත්‍රය, ගුවන් තොටුපොළවල්, සුවතා මධ්‍යස්ථාන, සංචාර තාක්ෂණ සපයන්නන්, ප්‍රවාහන සපයන්නන් සහ ක්ෂේත්‍රයේ CSR ක්‍රියාකාරකම් යනාදිය සඳහා කාණ්ඩ 50 යටතේ මෙහිදී සම්මාන ප්‍රදානය කර ඇත.

මේ සම්බන්ධයෙන් අදහස් දක්වමින් ශ්‍රී ලංකන් ගුවන් සමාගමේ ප්‍රධාන වාණිජ නිලධාරී  සිවා රාමචන්ද්‍රන් මහතා පවසා සිටියේ, “අප ලබා ඇති ගෝලීය සහ කලාපීය සම්මාන අතරට තවත් එක් ගෞරවාන්විත සම්මානයක් එකතුවීම පිළිබඳ ගුවන් සමාගම ඉතා සතුටට පත්ව සිටිනවා. මේ සම්මාන අපගේ පාරිභෝගිකයන් විසින් සිදුකළ තේරීමක් ලෙස විශ්වාස කරනවා" යනුවෙනි.

මේ අතර, ගුවන් සමාගමේ ලෝක ව්‍යාප්ත විකුණුම් බෙදාහැරීම් ප්‍රධානී දිමුතු තෙන්නකෝන් මහතා, "මේ සම්මාන තුළින් අප ගුවන් මගීන්ගේ ප්‍රියතම ගමනාන්ත වෙත සිදුකරන මෙහෙයුම් සිට ගෝලීය ගුවන් ගමන් ජාලය පුරාවට සිදුකරන ගුවන් සහ භූමි සේවාවන්, අපගේ අනගි නිෂ්පාදන යනාදිය ඇතුලත්ව සමස්ත ගුණාත්මකබව විදහා දක්වනවා" යැයි පවසා සිටියේය.