රවි හොඳම මුදල් ඇමති සම්මානය ලැබීම සිකුරාදා

ආසියා පැසිපික් කලාපයේ 2017 වසරේ හොඳම මුදල් අමාත්‍යවරයා ලෙස බ්‍රිතාන්‍ය 'ද බෑන්කර් ' සඟරාව මගින් නම් කළ මුදල් අමාත්‍ය රවි කරුණානායක මහතාට, ඊට අදාළ සම්මානය පිරිනැමීම ලබන සිකුරාදා (24දා) මහා බ්‍රිතාන්‍යයේදී සිදුවන බව මුදල් අමාත්‍යාංශය නිවේදනය කරයි.

නව ආර්ථික ප්‍රතිසංස්කරණ යුගයක් කරා ශ්‍රී ලංකාව රැගෙන යාම හා ඒ වෙනුවෙන් ශ්‍රී ලංකා සමාජය මානසික වශයෙන් සූදානම් කිරීමට ගත් උත්සාහය ඇගයීමට ලක්කරමින් බ්‍රිතාන්‍යයේ පළවන ප්‍රසිද්ධ මූල්‍ය සඟරාවක් වන 'ද බෑන්කර් ' සඟරාව විසින් ආසියා පැසිෆික් කලාපයේ 2017 වසරේ හොඳම මුදල් අමාත්‍යවරයා ලෙස නම් කළ මුදල් අමාත්‍ය රවි කරුණානායක මහතාට, ඊට අදාළ සම්මානය ප්‍රදානය කිරීම එළැඹෙන (24දා) බ්‍රිතාන්‍යයේ ලන්ඩන් නුවර %ද බෑන්කර්^ සඟරාවේ ප්‍රධාන මූලස්ථානයේදී සිදුකිරීමට නියමිතය.

ජාත්‍යන්තර මූල්‍ය ක්ෂේත්‍රයේ නමක් දිනා සිටින බ්‍රිතාන්‍යයේ ලන්ඩන් නුවර සිට ප්‍රසිද්ධ කරන මෙම සඟරාව රවි කරුණානායක මහතා මෙලෙස ආසියා පැසිෆික් කලාපයේ 2017 වසරේ හොඳම මුදල් මුදල් අමාත්‍යවරයා ලෙස නම් කර සිටින්නේ, ශ්‍රී ලංකාවේ ආර්ථික වර්ධනය මනා ලෙස කළමනාකරණය කරමින්, එය ස්ථාවර තත්ත්වයට ගෙන ඒමට හැකිවීම අගය කරමිනි. රටේ ගෙවුම් ශේෂය හේතුකොටගෙන ඇතිවන මූල්‍ය අර්බුද වළක්වා ගැනීමට සමත් වූ බවත්, රටේ මුදල් සංචිත යථාතත්ත්වයට ගෙන එමින් විදේශ ආයෝජකයන්ගේ විශ්වාස යළි ගොඩනැඟීමට මුදල් අමාත්‍යවරයාට හැකි වූ බවත් එම සඟරාව පෙන්වාදී ඇති බවද මුදල් අමාත්‍යාංශය කියයි.

එමෙන්ම, රටේ මූල්‍ය ඒකාග්‍රතාවයක් ඇතිකර ගනිමින් 2015 වසරේ පැවති අයවැය පරතරය වන 7% ප්‍රමාණය බලාපොරොත්තු වූ 5.6% ට වඩා අඩු ප්‍රමාණයකට 2016 වසරේදී එනම් 5.4% දක්වා අඩුකර ගැනීමට රවි කරුණානායක මහතා මෙම තනතුරට පත්වූ පසු හැකිවූ බවද එම සඟරාව තවදුරටත් ප්‍රකාශ කරන බව සඳහන් කරයි.

2014 වසරේදී ශ්‍රී ලංකාවේ ජාතික ආදායම රු.බිලියන 1,205ක් වූ අතර, එය 2015 වසරේදී රු.බිලියන 1,461 දක්වා වැඩිකර ගැනීමට හැකි වූ බවත්, මෙම කාලසීමාව තුළ බදු ආදායමද, රු.බිලියන 1,050 සිට රු.බිලියන 1,356 දක්වා ඉහළ මට්ටමකට රැගෙන ඒමට හැකි වූ බවත් අමාත්‍යාංශය වැඩිදුරටත් පවසයි.

බදු ගෙවීම නරක පුරුද්දක් නොවන බවත්, රටේ ඉදිරි සෞභාග්‍යය වෙනුවෙන් එය කළ යුතු කර්තව්‍යයක් බවත්, මිනිසුන්ගේ සිත් තුළට කාවැද්දීමට රජය සමත් වූ බවත් සඳහන් කරන 'ද බෑන්කර් ' සඟරාව, රජය මත යැපීමට බලා නොසිට සියලු පුරවැසියන් යම් බදු ගෙවීමක් කළ යුතු බව එමගින් අවධාරණය කරනලද බවද එම සඟරාව සඳහන් කරයි. මෙහි ප්‍රතිඵලයක් ලෙස ශ්‍රී ලංකාවේ බදු ගෙවන්නන්ගේ ලිපිගොනු 2015 පැවති ලක්ෂ 7ක ප්‍රමාණය මේ වනවිට ලක්ෂ 14 දක්වා ඉහළ ගොස් ඇති බවද එම සඟරාව වැඩිදුරටත් සඳහන් කරන බව අමාත්‍යාංශය පෙන්වා දෙයි.

ආර්ථික සංවර්ධනය වෙනුවෙන් දැක්වූ දායකත්වය සලකා බලා, 'ද බැන්කර් සඟරාව' මගින් වාර්ෂිකව සම්මාන ප්‍රදානය සිදු කරනු ලබන අතර, වසරේ හොඳම මුදල් අමාත්‍යවරයා, හොඳම මහ බැංකුව, හොඳම බැංකුව, හොඳම ආයෝජන බැංකුව, කලාපීය වශයෙන් හොඳම මුදල් අමාත්‍යවරුන් ඇතුළු සම්මාන රැසක් මෙහිදී පිරිනැමෙන බවද මුදල් අමාත්‍යාංශය වැඩිදුරටත් සඳහන් කර සිටියි.