ෆෙරාරි විදුලි මෝටර් රථයක් ඩොලර් මිලියන 40ට අලෙවි වෙයි

ෆෙරාරි හි ප්‍රථම විදුලි මෝටර් රථය පුණ්‍ය කටයුතු සඳහා පැවති අලෙවියකදී ඩොලර් මිලියන 40ක වාර්තාගත මිලකට අලෙවි වී  තිබේ. මෙය වෙන්දේසියකදී නව වාහනයක් අලෙවි වූ වැඩිම මිල ලෙස වාර්තා අතරට එක්වෙයි.

බ්‍රිතාන්‍ය අයිෆෝන් නිර්මාණකරුවෙකු වන සර් ජොනි අයිව්ගේ සංකල්පයක් වන ෆෙරාරි ලූස් විදුලි මෝටර් රථය  කැලිෆෝනියාවේ  පැවති උත්සවයේදී මෙම වෙන්දේසිය සිදුවූ අතර අලෙවි වූ අගය මෝටර් රථයේ සාමාන්‍ය මිල මෙන් 35 ගුණයකට වඩා වැඩිය.

ෆෙරාරි හි ලූස් රථය මැයි මාසයේදි දියත් කළ අතර ඇතැම් පුද්ගලයන් නව රථයට විවේචනද එල්ල කළේය.  සමහර විචාරකයින් පැවසුවේ එය වෙළඳ නාමයේ සාම්ප්‍රදායික මෝස්තරවලින් බැහැර වූ බවත් බැටරි බලයෙන් ක්‍රියාත්මක වීම සහ ආසන පහක් තිබීම නිසා වෙළඳ නාමයේ අනන්‍යතාවයෙන් කොටසක් අහිමි වූ බවත්ය.

මෝටර් රථය අලෙවියෙන් ලැබෙන සියලුම මුදල් ෆෙරාරි පදනමේ අධ්‍යාපනික වැඩසටහන් සඳහා පරිත්‍යාග කිරීමට නියමිතය.  ලූස් එළිදැක්වීම මෑත වසරවල නව මෝටර් රථයක විශාලතම දියත් කිරීම්වලින් එකක් ලෙස සැලකේ.