හීලෑ අලි ඇතුන්ගේ රෝගාබාධ රැසක් අඩුවෙලා

හීලෑ අලි අතුන් ආශිතව කාලයක් පැවැති රෝගාබාධ රැසක් මේ වන විට අඩු වී ඇතැයි පේරාදෙණිය විශ්වවිද්‍යාලයේ පශු වෛද්‍ය පීඨයේ මහාචාර්ය අශෝක දංගොල්ල මහතා පවසයි.

අලි ඇතුන් සම්බන්ධයෙන් වඩාත් විමසිලිමත් වීම නිසා මෙම රෝගාබාධ පාලනය කර ගැනීමට අවස්ථාව ලැබුණු බව මහාචාර්යවරයා කීවේය.

ඇසළ පෙරහැර මංගල්‍යයට සහභාගීවන අලි ඇතුන්ගේ වෛද්‍ය සායනය ශ්‍ර  දළදා මාලිගා චතුරසයේදී ඊයේ (02) පැවැති අතර එහිදි මහාචාර්යවරයා මේ බව පැවසුවේය.

මීට පෙර කරන ලද අලි ඇතුන්ගේ පරීක්ෂාවේදී අක්ෂි හා පාද ආශ්‍රිත රෝගය ද ක්ෂය රෝගය ද පැවති බව කී ඒ මහතා එම රෝග රැසක් මේ වන විට දැකිය නොහැකි යැයි ද කීවේය.

හීලෑ අලි ඇතුන් ආරක්ෂිත වුවත් අනිසි මිනිස් ක්‍රියාකාරකම් හේතුවෙන් වනාන්තර ආශ්‍රිත අලි ඇතුන් 400ක් පමණ වර්ෂයකට මරණයට පත්වන බව ද ඒ මහතා පැවසුවේය. දැනට වසර කිහිපයකට ඉහතදී 300කට අධික වූ මෙරට හීලෑ අලි අතුන්ගේ ප්‍රමාණය සියයකට වඩා අඩුවී ඇතැයි ද ඒ මහතා ප්‍රකාශ කළේය.

පේරාදෙණීය විශ්වවිද්‍යාලීය  පශු වෛද්‍ය පීඨයේ මෙහෙයවීම මත පැවැති මෙම වෛද්‍ය සායනයේදී හස්ති පාලකයන් සඳහා ද වෛද්‍ය සායනයක් පැවැත්විණි. ශ්‍ර  දළදා මාලිගාව සහ සිව් මහ දේවාල නියෝජනය කොට පෙරහැරේ ගමන් කරන අලි ඇතුන් මෙම සායනය සඳහා සහභාගී වූහ.

දුම්බර  එම්.ආර්. ප්‍රදීප්