හිටපු ජනපතිවරුන්ට ප්‍රමාණවත් ආරක්ෂාවක් ලබා දිය යුතුයි

හිටපු ජනාධිපතිවරුන් ජනතා බදු මුදලින් සුරසැප විඳීම නතර කරනවා සේම ඔවුන් රටට කළ සේවය සලකා ප්‍රමාණවත් ආරක්ෂාවක් ලබා දීමට කටයුතු කළ යුතු බව සමගි ජන බලවේගයේ පාර්ලිමේන්තු මන්ත්‍රී එස්.එම්.මරික්කාර් මහතා පැවසීය.

එමෙන්ම වර්තමාන ජනාධිපති අනුර කුමාර දිසානායක මහතාටද ප්‍රමාණවත් ආරක්ෂාවක් ලබා දිය යුතු බව අද (03දා) සමගි ජන බලවේග ප්‍රධාන කාර්යාලයේ පැවති මාධ්‍ය හමුවකට එක්වෙමින් හෙතෙම  සඳහන් කළේය. එහිදී වැඩිදුරටත්  පාර්ලිමේන්තු මන්ත්‍රී එස්.එම්.මරික්කාර් මහතා මෙලෙස අදහස් දක්වා සිටියේය.

“හිටපු ජනාධිපතිවරුන්ගේ අයිතිවාසිකම් අහෝස් කරන්න ගැසට් එකක් ගහලා තියෙනවා. අපි පැහැදිලිව කියන්න කැමතියි දීර්ඝ කාලයක් තිස්සේ ජනතා බදු මුදල් වලින් සුරසැප විඳින එක යුක්ති සහගත නෑ කියලා. ඒත් මේ ජනාධිපතිවරුන් රටට කරපු සේවාවන් එක්ක අඩුම තරමේ ඔවුන්ගේ ආරක්ෂාව ඉවත් නොකර තියන්න ඕනී කියන එක තමයි අපේ මතය.

අනිත් පැත්තෙන් විලාසිතාවකට, ට්‍රෙන්ඩ් එකකට වගේනේ මේක කරන්නේ. ඒක ට්‍රෙන්ඩ් එකට වගේ කරන්නේ නැතිව සාධාරණ අයිතිවාසිකම් ලබා දීලා අසාධාරණ දේවල් ඉවත් කළාට ගැටළුවක් නෑ. වර්තමාන ආණ්ඩුවේ දැක්කා අපි උදාහරණයක්. දැන් ඉන්නේ ජනාධිපතිතුමා අපෙත් ජනාධිපතිතුමා. රටේ මිලියන 22ම ජනාධිපති. එතුමාට ප්‍රමාණවත් ආරක්ෂාවක් ඕනී කියලා තමයි අපි කියන්නේ. ධුරයේ ඉන්න ජනාධිපති නිල නිවාසයක් පාවිච්චි කළාට ප්‍රශ්නයක් නෑ. ආරක්ෂාව පිළිබඳ සැලකිලිමත් වෙන්න.

මම දැක්කා මාධ්‍ය වාර්තා කරලා තියෙනවා ජනාධිපතිතුමා නවාතැන් ගන්න හෝටලයක් අසල ගෙදරක පුපුරණ ද්‍රව්‍ය තිබුණා කියලා. මේක මේ ගමේ සත්තු දඩයම් කරන ඩප්පියක් තමයි හොයා ගත්තේ කියන තැනට ලඝු කරන්නේ නැතිව ප්‍රමාණවත් ආරක්ෂාවක් එතුමාට ලබා දිය යුතුයි. එතුමා ලබා ගත යුතුයි. ඇමතිවරුන්ටත් ගන්න වෙයි මේ හූ කියන විදියට. ඒ නිසා අපි පැහැදිලිව කියන්න කැමතියි ”