සැරයන්ගේ ගිනි අවිය උඳුරාගෙන වෙඩි තබන්න හදලා

රාත්‍රී  ජංගම සංචාරයේ නිරතව සිටි පානදුර දකුණ පොලිසියේ සැරයන්වරයකුගේ පිස්තෝල ගිනි අවිය සැකකටයුතු පුද්ගලයකු උදුරාගෙන වෙඩි තැබීමට උත්සාහ දැරූවද ගිනි අවිය ක්‍රියාත්මක නොවීමෙන් පොලිස් නිලධාරීන් ගේ ජීවිත අනූ නමයෙන් බේරි ඇතැයි පොලිස් ආරංචිමාර්ග සඳහන් කරයි.

එම අවස්ථාවේදී වහා ක්‍රියාත්මක වූ නිලධාරීන් සැකකරු දැඩි පරිශ්‍රමයක් දරා මෙල්ල කර අත්අඩංගුවට ගැනීමට ක්‍රියා කර ඇත.

සැකකරු පරික්ෂා කිරීමේදී ඔහු සන්තකයේ තිබී මෙරට නිෂ්පාදිත ජීව අත්බෝම්භයක් සහ මන්නයක් පොලිස් භාරයට ගෙන ඇත.

පානදුර දකුණ පොලිසියේ සැරයන්වරයකු සහ කොස්තාපල්වරුන් දෙදෙනෙකු ඊයේ (29)  රාත්‍රී ජංගම සංචාරයේ නිරත වෙද්දී පානදුර ගාලුපාර සතොස අසල සැකකටයුතු පුද්ගලයකු රැඳී සිටිනු දැක ජීප් රථය නවතා සැරයන් වරයා සහ කොස්තාපල්වරයා ඔහු  අසලට ගොස් තිබූ බව පොලිසිය කියයි.

එම ස්ථානයේ රැඳී සිටීම සම්බන්ධයෙන් ප්‍රශ්න කිරීම ආරම්භ කිරීමත් සමගම සැකකරු සැරයන්රවයා ගේ පිස්තෝල  රඳවනයේ බහා තිබූ පිස්තෝල ගිනි අවිය එක වරම ඔහු අතට ගෙන සැරයන්වරයා දෙසට එල්ල කර ක්‍රියාත්මක කර ඇතත් වාසනාවකට මෙන් එය ක්‍රියාත්මක වී නැතැයි උසස් පොලිස් නිලධාරියකු පැවසිය.

ඒ සමගම ක්‍රියාත්මක වූ සැරයන්වරයා සහ අනෙක් කොස්තාපල්වරයා මෙන්ම රියදුරු කොස්තාපල්වරයා  දැඩි පරිශ්‍රමයක් දරා සැකකරු මෙල්ල කර අත් මාංචු දමා සෝදිසි කිරීමේදී ඔහු සන්තකයේ තිබී මන්නයක් සහ ජීව අත්බෝම්බය සොයාගැනීමට හැකිවූ බව පොලිසිය කියයි.

අනතුරුව සැකකරු පොලිසියට රැගෙන ඒමෙන් අනතුරුව සිදු කළ සොයා බැලීමේදී සැකකරු මොරටුව ඇතුළු පොලිසි ගණනාවක අපරාධ රැසකට සම්බන්ධ පුද්ගලයකු බවට අනාවරණය වූ බව උසස් පොලිස් නිලධාරියා වැඩිදුරටත් පැවසීය.