සහල් තොග රජයට පවරා ගැනීම ගැන බන්දුලගෙන් ප්‍රකාශයක්

සහල් තොග රජයට පවරා ගැනීම පිළිබඳව වෙළඳ අමාත්‍ය බන්දුල ගුණවර්ධන මහතා අද විශේෂ ප්‍රකාශයක් කළේය.

ඇතැම් ව්‍යාපාරිකයන් සහල් තොග වෙළඳපොළට නිකුත් නොකිරීම හේතුවෙන් මෙම ක්‍රියාමාර්ගය ගැනීමට සිදුවූ බව ඔහු ප්‍රකාශ කළේය.

එසේම මේ වන විට සහල් තොග නිසි පරිදි වෙළඳපොළට නිකුත් කිරීමට ව්‍යාපාරිකයන් එකඟ වී ඇති බවද ඔහු සඳහන් කළේය.

“සහල්වල මිල පාලනය කිරීමට රජය උත්සාහ ගත්තත් සියලු උත්සාහයන් අසාර්ථක වුණා. සහල් ව්‍යාපාරිකයන් සමග නාඩු කිලෝවක් 98ක් හා සම්බා කිලෝවක් 103ක් සපයන බවට සඳහන් කළා.

පසුගිය සතිය තුළදී ඔවුන් දිගින් දිගටම සහල් සැපයීම නැවැත්තුවා. ඔවුන් සහල් දෙන්න සතොසේ ටෙන්ඩර්වලට ඉදිරිපත් වුණේ නෑ.

දිනකට හාල් කිලෝ ලක්ෂ 5ක් 6ක් නිකුත් කරන ඇතැම් ව්‍යාපාරිකයන් දිනකට සහල් කිලෝ 30000ක් පමණ නිකුත් කර තිබුණා.

ඒ අනුව අපි අත්‍යාවශ්‍ය ආහාර කොමසාරිස්වරයෙක් පත්කළා. ඒ අනුව අපි සතොසට සහල් තොග ලබා ගත්තා. සාකච්ඡා තිබිලා සම්මුතීන් ඇතිකරගෙන තිබුණත් ඒවට අනුව කටයුතු නොකිරීම නිසයි සතොසට සහල් ලබා ගත්තේ.

අද දිනයේ සිට සුපුරුදු පරිදි සහල් තොග නිකුත් කරනවා කියලා ඔවුන් කියනවා. තමන්ගේ රාජකාරී නිරුපද්‍රිතව කළොත් වැටලීමක් කළොත් අරන් එන්නවත් අවශ්‍යථාවක් නෑ. ව්‍යාපාරික ආයතනවලටත් නිරුපද්‍රිතව ව්‍යාපාර කරගෙන යන්න පුළුවන්.”