ශ්‍රේෂ්ඨාධිකරණයේ තීරණය පරමාධිපත්‍ය සුරැකීමක්

මහ මැතිවරණය පැවැත්වීමට එරෙහිව විපක්ෂය විසින් ඉදිරිපත් කළ පෙත්සම විභාගයට නොගෙන ප්‍රතික්ෂේප කිරීමට ශ්‍රේෂ්ඨාධිකරණය ගත් තීරණය මෙරට ජනතා පරමාධිපත්‍ය සුරැකීමක් බව ඇමති ප්‍රසන්න රණතුංග මහතා පවසයි.

ඔහු අවධාරණය කරන්නේ මෙමගින් මෙරට බහුතර ජනතාවගේ අපේක්ෂාවන් ඉටුවූ බවයි. විපක්ෂය විසින් මැතිවරණය කල් දමන ලෙස ඉල්ලමින් ශ්‍රේෂ්ඨාධිකරණයට ඉදිරිපත් කර තිබු පෙත්සම් සලකා විභාගයට නොගෙන ප්‍රතික්ෂේප කිරිමෙන් අනතුරුව ශ්‍රේෂ්ඨාධිකරණ භුමියේ දි මාධ්‍යවේදීන් අමතමින් ඇමති ප්‍රසන්න රණතුංග මහතා මේ බව සඳහන් කලේය.

එහිදි වැඩිදුරටත් අදහස් දැක්වු ඇමතිවරයා මෙසේද කිවේය.

‘‘මං හිතනවා මේ රටේ ජනතාවගේ පරමාධීපත්‍ය අයිතිය රකින තීන්දුවක් තමයි අද දුන්නේ. අපි ඒ පිළිබද ව පක්ෂයක් හැටියට සංතෝෂ වෙනවා. මොකද පහුගිය කාල සීමාවේි දි මේ විපක්ෂය හැමදාම ඡන්දය ඉල්ලන්න ඕන කණ්ඩායම ඡන්දය කල් දාන්න නොයෙකුත් උපක්‍රම, උප්පරවැට්ටි පාවිච්චි කළා.

කොරෝනා එක පාවිච්චි කරලා ජනතාවගේ ආරක්ෂාව නැති බව කියන්න පටන් ගත්තා. නමුත් මැතිවරණය පිළිබදව අපි පැහැදිලිව කියන්න ඕනේ ඒ අයට ඕන වුණේ ඒ ගොල්ලන්ගේ බෙදීම තුළ, පක්ෂ බෙදීම තුළ ඒ අය දන්නවා මැතිවරණයේ අන්ත පරාජයක් ලබනවා. ඒක වහගන්න මැතිවරණ කොමිසම පාවිච්චි කරලා ඒ ගොල්ලෝ නඩුදාලා උසාවිය හරහා ඒ ගොල්ලන්ගේ තීන්දුව ගන්න හැදුවා.

නමුත් මම අද විශ්වාස කරනවා අද විපක්ෂයටම  තීන්දුව ලැබිලා තියෙනවා. මැතිවරණ කොමිසමේ වගකීම තමයි ඒ අයට මේ වෙලාවේ බලය පවරලා තියෙන්නේ මැතිවරණයක් තියන්න. නැතුව මැතිවරණ කල් දාන්න නෙමේ. ඒ නිසා ඉතා ඉක්මණින් කෙටි කාලයක් තුළ මේ රටේ ජනතාවගේ අයිතිය සුරකින්න ඕනේ.

ප්‍රජාතන්ත්‍රවාදී අයිතිය රකින්න ඕනේ. ස්ථාවර රජයක් පිහිටවන්න ඕනේ. රටේ දේහපාලන ස්ථාවරය ගොඩනගන්න ඕනේ. එතකොට තමයි රටක් හැටියට අපිට නැගිටින්න පුළුවන් වෙන්නේ. මේ ව්‍යසනයෙන් ගොඩ එන්න මේක ඉතාම වැදගත් වෙනවා.“