ශ්‍රි ලන්කන් හිටපු සභාපතිගෙන් හා CEO ගෙන් පැය 8ක් ප්‍රකාශ ගනියි

ශ්‍රී ලන්කන් ගුවන් සමාගමේ හිටපු සභාපති නිශාන්ත වික‍්‍රමසිංහ සහ එහි හිටපු ප‍්‍රධාන විධායක නිලධාරී කපිල චන්ද්‍රසේන යන මහත්වරුන්ගෙන් ශ්‍රී ලන්කන් සහ මිහින් ලංකා ආයතන වල සිදුවු බව කියන දුෂණ සිද්ධීන් සම්බන්ධයෙන් විශේෂ ජනාධිපති පරීක්‍ෂණ කොමිසමේ නිලධාරීහු අද (23දා) පැය 08 කට ආසන්න කාලයක් පුරා ප‍්‍රකාශ ලබාගත්හ.

ශ්‍රී ලන්කන් සහ මිහින් ලංකා ආයතන වල සිදුවු බව කියන දුෂණ සිද්ධීන් සම්බන්ධයෙන් ප‍්‍රකාශ ලබාගැනීම සඳහා ශ්‍රී ලන්කන් සහ මිහින් ලංකා ආයතන වල දුෂණ සෙවීම සඳහා පත් කළ විශේෂ ජනාධිපති පරීක්‍ෂණ කොමිසම හමුවේ පෙනී සිටින ලෙස දැනුම් දෙමින් කොමිසම විසින් නිකුත් කරන ලද නොතිසියකට අනුව නිශාන්ත වික‍්‍රමසිංහ සහ කපිල චන්ද්‍රසේන යන මහත්වරුන් ඊයේ පෙරවරු 8.30ට පමණ කොමිසම හමුවේ පෙනී සිටියහ.

ඉන් අනතුරුව ඔවුන් කොමිසමේ විමර්ශන අංශයට කැඳවාගෙන ගොස් එහිදී ඔවුන්ගෙන් ප‍්‍රකාශ සටහන් කරගැනීම ඇරඹු අතර දිවා ආහාර ලබාගැනීම සඳහා එම මහත්වරුන්ට කල් ලබාදුන්හ.

ඉන් අනතුරුව යළිත් ඔවුන්ගේ ප‍්‍රකාශ ලබාගැනීම ආරම්භ කළ කොමිසමේ විමර්ශන නිලධාරීහු කපිල චන්ද්‍රසේන මහතාගෙන් පස්වරු 2.30 පමණ දක්වාත් නිශාන්ත වික‍්‍රමසිංහ මහතාගෙන් පස්වරු 4.00 පමණ දක්වාත් ප‍්‍රකාශ ලබා ගත්හ.