විශේෂ රැස්වීමී දිනයක් ලෙස අද පාර්ලිමේන්තුව රැස්වෙයි

විශේෂ පාර්ලි‍මේන්තු රැස්වීම් දිනයක් ලෙස අද (30දා) පාර්ලිමේන්තුව රැස්වීමට පාර්ලිමේන්තු කටයුතු පිළිබඳ කාරක සභාව තීරණය කර තිබේ.

2024 අංක 44 දරන රාජ්‍ය මූල්‍ය කළමනාකරණ පනතේ 11 වැනි වගන්තිය ප්‍රකාරව එක් එක් වර්ෂයේ  ජූනි 30 හෝ එදිනට පෙර ආණ්ඩුව විසින් මූල්‍ය ක්‍රමෝපාය ප්‍රකාශයක් නිවේදනය කිරීමේ අවශ්‍යතාවය සම්පූර්ණ කිරීම සඳහා මෙසේ පාර්ලිමේන්තුව රැස්වීමට කටයුතු යොදා තිබේ.

ඒ අනුව පාර්ලිමේන්තුවේ ස්ථාවර නියෝග 16 ප්‍රකාරව අග්‍රාමාත්‍යවරිය විසින් කරනු ලබන ඉල්ලීමක් මත කථානායකවරයා විසින් පාර්ලිමේන්තුව අද(30දා) පෙ.ව 9.30ට කැඳවා ඇති අතර, ඊට අදාළ ගැසට් නිවේදනයද පසුගියදා නිකුත් කෙරිණි.

ඒ අනුව මීට අදාළව ආණ්ඩුව විසින් ගෙනෙනු ලබන සභාව කල්තැබීමේ විවාදය අද ප.ව 4.30 දක්වා   පැවැත්වීමට කටයුතු යොදා තිබේ.