විදෙස්ගත ශ්‍රමිකයන්ට දෙන තීරු බදු සහන ඉහළට

විදේශ රැකියාවල නියුතු ශ්‍රී ලාංකිකයන් සඳහා තීරුබදු සහන (Duty-Free Allowances) ඉහළ නැංවීම සහ දැනට ක්‍රියාත්මක ක්‍රමවේදය වඩාත් විධිමත් කිරීම පිළිබඳ රජයේ අවධානය යොමු වී ඇති බව විදේශ කටයුතු, විදේශ රැකියා සහ සංචාරක අමාත්‍ය විජිත හේරත් මහතා පැවසීය.

ඒ සම්බන්ධයෙන් විශේෂ සාකච්ඡාවක් පසුගිය ජූලි 14 වැනිදා විදේශ කටයුතු, විදේශ රැකියා සහ සංචාරක අමාත්‍යාංශයේදී පැවැත්වුණු අතර, එම අවස්ථාවට එක්වෙමින් අමාත්‍යවරයා මේ බව සඳහන් කළේය. අදාළ අමාත්‍යාංශ සහ රාජ්‍ය ආයතන නියෝජනය කරමින් උසස් නිලධාරීන් පිරිසක් ද මෙම සාකච්ඡාවට සහභාගි වූහ.

බැංකු පද්ධතිය ඇතුළු නිල මාර්ග ඔස්සේ ශ්‍රී ලංකාවට විදේශ ප්‍රේෂණ එවන ශ්‍රී ලාංකික ශ්‍රමිකයන්ට වැඩි ප්‍රතිලාභ සහ සහන ලබාදීම මෙන්ම, එම ක්‍රියාවලිය වඩාත් සරල හා කාර්යක්ෂම කිරීම පිළිබඳව මෙහිදී විශේෂ අවධානය යොමු කෙරිණි.

එමෙන්ම, රේගු ක්‍රියාපටිපාටි සරල කිරීම, තීරුබදු සහන විදේශ ප්‍රේෂණ වාර්තා (Remittance Records) සමඟ සෘජුව සම්බන්ධ කිරීම සහ විදේශගත ශ්‍රී ලාංකිකයන් සඳහා ණය පහසුකම් ලබාගැනීමේ අවස්ථා තවදුරටත් පුළුල් කිරීම පිළිබඳව ද දීර්ඝ ලෙස සාකච්ඡා කෙරිණි.

මෙම වැඩපිළිවෙළ කාර්යක්ෂමව ක්‍රියාත්මක කිරීම සඳහා මුදල් අමාත්‍යාංශය, ශ්‍රී ලංකා මහ බැංකුව, ශ්‍රී ලංකා රේගුව, වාණිජ බැංකු සහ ලංකා රෙමිට් (Lanka Remit) ආයතනය අතර පවතින සම්බන්ධීකරණය තවදුරටත් ශක්තිමත් කිරීමට පියවර ගන්නා බව ද මෙහිදී අවධාරණය කෙරිණි.

රටේ ආර්ථිකයට සුවිශේෂී දායකත්වයක් සපයන විදේශගත ශ්‍රී ලාංකිකයන්ගේ මෙහෙවර නිසි ලෙස ඇගයීමට ලක් කරමින්, ඔවුන්ට හිමිවිය යුතු තීරුබදු සහන සහ අනෙකුත් ප්‍රතිලාභ වඩාත් විනිවිදභාවයෙන්, සාධාරණව සහ ප්‍රායෝගිකව ලබාදීම රජයේ අපේක්ෂාව බව ද අමාත්‍යවරයා මෙහිදී අවධාරණය කළේය.