විදෙස් සංචාරකයන්ට කටුනායකින් තාවකාලිකව මෙරටට වලංගු රියදුරු බලපත්‍රයක්

ශ්‍රී ලංකාවට පැමිණෙන විදේශීය සංචාරකයන්ට ඔවුන්ගේ රියැදුරු බලපත්‍රය සහ වීසා කාළය අනුව මෙරටට වලංගු වන රියැදුරු බලපත්‍රයක් විනාඩි 05 ක් වැනි සුළු කාළයකින් ලබා ගැනීමේ පහසුකම සහිත මෝටර් රථ ප්‍රවාහන දෙපාර්තමේන්තුවේ නව ශාඛා කාර්යාලක් කටුනායක ගුවන් තොටුපොළ පැමිණීමේ පර්යන්තයේ දී ප්‍රවාහන මහාමාර්ග, සිවිල් ගුවන් සේවා අමාත්‍ය බිමල් රත්නායක මහතා අතින් 08/03 දින පස්වරු 03.00 ට විවෘත විය .

වසරකට වඩා වැඩි කාළයක් මෙරට රැදී සිටින විදේශීය සංචාරකයන්ට , ඔවුන් සතුව බර වාහන සදහා ද රියැදුරු බලපත්‍ර තිබේ නම් ඔවුන් සදහා ද , ත්‍රිරෝද රථ පැදවීම සදහා ඉන්දියාව වැනි රට වල සිට මෙරටට පැමිණෙන සංචාරකයන් සදහා ද , ඔවුන්ට එම රට වල ඒ සදහා ද රියැදුරු බලපත්‍ර තිබේ නම් ඔවුන් සදහා ද මෙම ශාඛා කාර්යාලයෙන් රියැදුරු බලපත්‍ර ලබා ගත හැකිය .

එසේම විද්‍යත් තැපෑල මගින් මෙරටට පැමිණෙන සංචාරකයන් මෙම කාර්යාල වෙත තම අයැදුම් පත් යොමු කළ හැකි බවත් , එමගින් මෙම බලපත්‍ර නිකුත් කිරීමේ කාළය තවදුරටත් අවම කර ගත හැකි බව ද අමාත්‍යවරයා පැවසීය .

එමෙන්ම තව මාස කීපයකින් පොලීසියේ රථ වාහන අංශයේ නිලධාරීන් හට ස්මාර්ට් ජංගම දුරකථන ලබා දෙන බවත් , එවිට මෙම කාර්යාල මගින් විදේශීය සංචාරකයන් සදහා , කිව්. ආර්. කේතයක් ලබා දීමට කටයුතු කරන බවත් අමාත්‍ය බිමල් රත්නායක මහතා වැඩිදුරටත් පැවසීය .

විදේශීය සංචාරකයන්ට මීට පෙර පැවති ක්‍රමය අනුව වේරහැර පිහිටි මෝටර් රථ වාහන දෙපාර්තමේන්තුවේ , රියැදුරු බලපත්‍ර ශාඛාව වෙත පැමිණ මෙසේ මෙරටට වලංගු රියැදුරු බලපත්‍රය ලබා ගැනීමට සිදු වන බවත් , ඒ සදහා ඔවුන්ගේ සංචාරක කාළයෙන් දින කීපයක් වෙන් කිරීමට සිදු වන බවත් අමාත්‍යවරයා පෙන්වා දුන්නේය .

මෙම අවස්ථාවට මෝටර් රථ ප්‍රවාහන කොමසාරිස් ජනරාල් කමල් අමරසිංහ , සීමාසහිත ගුවන් තොටුපොළ සහ ගුවන් සේවා සමාගමේ සභාපති විශ්‍රාමික හර්ෂ අබේවික්‍රම , ශ්‍රී ලංකා සිවිල් ගුවන් සේවා අධිකාරියේ සභාපති සුනිල් ජයරත්න යන මහත්වරුන් ඇතුළු විශාල පිරිසක් පැමිණ සහභාගී වී සිටියහ .

මෙහි ප්‍රථම රියැදුරු බලපත්‍රය ඉන්දියානු ජාතිකයෙකුටත් , දෙවැන්න ඉතාලි ජාතිකයෙකුටත් අමාත්‍යවරයා විසින් පිරිනැමීම සිදු කෙරුණි .