විදුලි බල පනත අද විවාදයට

ශ්‍රී ලංකා විදුලි බල (සංශෝධන) පනත් කෙටුම්පත දෙවැනිවර කියවීමේ විවාදය අද (06දා) පැවැත්වීමට නියමිතව තිබේ.

මෙම විවාදය පසුගිය 24 වැනිදා විවාදයට ගැනීමට නියමිතව තිබුණද පනත් කෙටුම්පත සම්බන්ධ තාක්ෂණික කාරණා හේතුවෙන් එදින විවාදයට නොගෙන කල් දැමීමට පාර්ලිමේන්තු කටයුතු පිළිබඳ කාරක සභාව තීරණය කළේය.

ඒ අනුව අද දිනයේදී මෙම විවාදය පෙරවරු 11.30 සිට පස්වර් 05 දක්වා පැවැත්වීමට කටයුතු යොදා ඇති අතර, විවාදය අවසනායේදී පනත් කෙටුම්පතට අදාළව ඡන්ද විමසීම සිදුකිරීමට නියමිතව ඇත.

මෙම පනත් කෙටුම්පත ශ්‍රේෂ්ඨාධිකරණය හමුවේ අභියෝග කළ අතර, එහිදී ශ්‍රී ලංකා විදුලිබල (සංශෝධන) නැමැති පනත් කෙටුම්පතේ ඇතැම් වගන්ති ආණ්ඩුක්‍රම ව්‍යවස්ථාව උල්ලංඝණය කරන අතර, ඒ සඳහා පාර්ලිමේන්තුවේ විශේෂ බහුතරයක් සහ ජනමත විචාරණයක් අවශ්‍ය බවත්, කෙසේ වෙතත් එම වගන්ති ශ්‍රේෂ්ඨාධිකරණ තීරණය ප්‍රකාරව සංශෝධනය කරන්නේ නම් එම උල්ලංඝණය කිරීම් මග හැරී යන බවත් නියෝජ්‍ය කථානායක වෛද්‍ය රිස්වි සාලි මහතා ශ්‍රේෂ්ඨාධිකරණයේ තීරණය පාර්ලිමේන්තුවට දැනුම් දෙමින් පැවසීය.

මෙම පනත් කෙටුම්පතේ 13(1) (අ) වගන්තියේ විවිධාංගීකරණයේ දෙවන අදියරේ සේවකයන් මාරු කිරීම සහ සේවකයන්ගේ අයිතිවාසිකම් සම්බන්ධයෙන් කිසිදු ප්‍රතිපාදනයක් අන්තර්ගත නොවන බැවින් අපහැදිලි සහ අත්තනෝමතික වන බවද ශ්‍රේෂ්ඨාධිකරණය තීරණය කර ඇත. කෙසේ වෙතත් ලබා දී ඇති සංශෝධන සිදු කරන්නේ නම් ඒ හරහා සිදුවන උල්ලංඝණය කිරීම් ඉවත්ව යන බවටද ශ්‍රේෂ්ඨාධිකරණ තීරණයේ මගින් දැනුම් දී ඇත.