විපතට පත් ජනතාවට සහන දෙන්න ජනපති උතුරුමැදට

අධික වැසි සමඟ හටගත් ජල ගැලීම්වලින් විපතට පත්වූවන්ට සහන සැලසීම පිළිබඳව සොයා බැලීමට ජනාධිපති ගෝඨාභය රාජපක්ෂ මහතා අද (23දා) අනුරාධපුරයේ සහ පොළොන්නරුවේ ස්ථාන කිහියක නිරීක්ෂණ චාරිකාවක නිරත වෙයි.

අද පෙරවරුවේ අනුරාධපුර ජනාධිපති මන්දිරයේ දී දේශපාලන බලධාරීන් සහ රාජ්‍ය නිලධාරින් හමු වු ජනාධිපතිවරයා සහන වැඩපිළිවෙළ විමර්ශනය කළේය.

අවතැන්වූවන් වෙනුවෙන් ක්‍රියාත්මක සුබසාධන වැඩපිළිවෙළ කඩිනම්ව හා අඛණ්ඩව ඉදිරියට ක්‍රියාත්මක කිරීමට ජනාධිපතිවරයා නිලධාරින්ට උපදෙස් දුන්නේය.

අදාළ සහන කටයුතු අදියර දෙකක් යටතේ ක්‍රියාවට නංවා තිබේ. ආපදා අවස්ථාවේ දී ලබාදිය යුතු සහන පිළිබඳ මෙන්ම ආපදාව පහව යාමෙන් අනතුරුව ක්‍රියාත්මක කළ යුතු වැඩපිළිවෙළ ඊට අයත්ය. මේ කටයුතුවලදි රජය ඉතා වගකීමෙන් ක්‍රියා කරන බව ජනාධිපතිවරයා  අවධාරණය කළේය.

නිවාසවලට සිදුව ඇති හානි පිළිබඳ සොයා බලා වහා ක්‍රියාකිරිමට ජනාධිපතිවරයා උපදෙස් දුන්නේය. ජනතාවගේ සෞඛ්‍ය පහසුකම් පිළිබඳව සොයා බැලිමට ද උපදෙස් දෙනු ලැබිණ. විනාශ වී ඇති වැව් අමුණු ප්‍රතිසංස්කරණය සහ මහාමාර්ග හා ඇල මාර්ග ඇතුළු යටිතල පහසුකම් කඩිනමින් යථා තත්ත්වයට පත් කිරීම කෙරෙහි ද මෙහිදී අවධානය යොමු විය.

වගාවන්ට සිදුව ඇති හානි පිළිබඳව සොයා බලා අවශ්‍ය පියවර ගන්නැයි ජනාධිපතිවරයා අදාළ අංශවලට උපදෙස් දුන්නේය.