රු. 30000ක අල්ලස් ගත් හිටපු සහකාර පොලිස් අධිකාරීවරයෙක් වසර 14ක් හිරේට

සම්බාහන මධ්‍යස්ථානයක් කරදරයකින් තොරව පවත්වාගෙන යෑම සදහා එහි හිමිකාරියගෙන් රුපියල් 30000/-ක අල්ලසක් ඉල්ලා ලබාගැනීමේ චෝදනාවන්ට වරදකරුවු වෙන්නප්පුව හිටපු සහකාර පොලිස් අධිකාරීවරයාට වසර 14ක බරපතල වැඩ සහිත සිරදඬුවමක් නියම කළ කොළඹ මහාධිකරණ විනිසුරු මහේෂ් වීරමන් මහතා අල්ලස් වශයෙන් ලබාගත් රුපියල් 30000/-ක මුදල යළි අයකර ගැනීමටද නියම කළේය.

වරදකරුවන් අත්අඩංගුවට ගෙන නීතීය ක්‍රියාත්මක කිරීමට යොදවා සිටියදී මීට වසර 07කට පෙර කළ වරදක් සම්බන්ධයෙන් විත්තිකරුට එරෙහිව වු චෝදනාවන් පැමිණීල්ල විසින් සාධාරණ සැකයකින් තොරව ඔප්පු කර ඇතැයි  තීරණය කරමින් විත්තිකරුට අදාළ දඬුවම් නියම කළ විනිසුරුවරයා රුපියල් 30000/-ක දඩයකටද විත්තිකරු යටත් කළේය.

චෝදනාවන්ට වරදකරු වීමෙන් අනතුරුව මෙලෙස දඬුවම් නියම වුයේ වෙන්නප්පුව සහකාර පොලිස් අධිකාරීවරයා වශයෙන් කටයුතු කළ ජයතිලක බණ්ඩාර නමැත්තාටය.

2018 බෙරවාරී 08 වැනිදා හෝ ඊට ආසන්න දිනයක වෙන්නප්පුවේදී එහ ප්‍රදේශයේ පවත්වාගෙන ගිය ආයුර්වේද සම්භාහන මධ්‍යස්ථානයක් කරදරයකින් තොරව පවත්වාගෙන යෑම සදහා එහි හිමිකාරියගෙන් රුපියල් 40000/-ක අල්ලසක් ඉල්ලා ඉන් රුපියල් 30000/-ක් ලබාගැනීම ඇතු`ථ චෝදනා 06ක් යටතේ අල්ලස් කොමිසම විත්තිකරුට එරෙහිව නඩු පවරා තිබිණී.

සිද්ධිය සම්බන්ධයෙන් පැවැති දීර්ඝ නඩු විභාගයේදී විත්තිකරු මීට වසර 07කට පෙර වරදකරුවන් අත්අඩංගුවට ගෙන නීතීය ක්‍රියාත්මක කිරීම සඳහා  වෙන්නප්පුව සහකාර පොලිස් අධිකාරීවරයා වශයෙන් සේවයේ යොදවා සිටියදී පැමිණීලිකාර කාන්තාව වෙන්නප්පුව නගරයේ පවත්වාගෙන ගිය ආයුර්වේද සම්භාහන මධ්‍යස්ථානය කරදරයකින් තොරව පවත්වාගෙන යෑම සදහා රුපියල් 40000/-ක මුදලක් ඉල්ලා අති බව’් පසුව එම මුදල රුපියල් 30000/- දක්වා අඩුකර ඇති බවත් අනාවරණය විය.

ඒ පිළිබඳව ඇය අල්ලස් කොමිසමට කළ පැමිණීල්ලකට අනුව කළ වැටලීමකදී විත්තිකරු රුපියල් 30000/-ක මුදලක් අල්ලස් වශයෙන් ලබාගැනීමේදී අල්ලස් කොමිසමේ නිලධාරීන් විසින් අත්අඩංගුවට ගෙන ඇති බවත් අනාවරණය වු අතර විත්තිකරුට එරෙහි චෝදනාවන් පැමිණීල්ල විසින් සාධාරණ සැකයකින් තොරව ඔප්පු කර ඇති බව දීර්ඝ නඩු විභාගය අවසානයේදී විනිසුරුවරයා තීන්දුවේ සඳහන් කර ඇත.

 ඒ අනුව අදාළ දඬුවම් නියම කළ විනිසුරුවරයා දඩ සහ දණ්ඩන මුදල් නොගෙවුවහොත් අමතර සිරදඬුවම්ද නියම කළේය.