රු. 10000ක අල්ලස් ගත් පොලිස් සැරයන් අත්අඩංගුවට

රු.10000ක අල්ලස් මුදලක් ලබා ගත් පොලිස් සැරයන්වරයෙකු අත් අඩංගුවට ගෙන අධිකරණයට ඉදිරිපත් කළ  පසු මේ මස 18 වැනි දින දක්වා රක්ෂිත බන්ධනාගාර ගත කළ බව අල්ලස් කොමිසම සඳහන් කරයි.

කන්දකැටිය ප්‍රදේශයේ ව්‍යාපාරිකයකු විසින් සිදු කළ පැමිණිල්ලක් අනුව කීර්ති බණ්ඩාරපුර පොලිස් ස්ථානයේ සැරයන්වරයෙකු රු. 10,000/- අල්ලස් ඉල්ලා ලබා ගැනීමේදී කීර්ති බණ්ඩාරපුර හෝටලයකදී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අද (05දා)  අත්අඩංගුවට ගෙන තිබේ.

පැමිණිලිකරුට අයත් වැලි ප්‍රවාහනය කරනු ලබන ලොරි රථයක් නවතා එහි වැලි ප්‍රවාහන බලපත්‍රය අත්සන් නොකර සිටීමටත්, වැලි ප්‍රවාහන කටයුතු බාධාවකින් තොරව කරගෙන යාමටත් රු. 10,000/- ක අල්ලස් ඉල්ලා ලබා ගැනීමේදී සැකකරු අත්අඩංගුවට ගත්  බව අල්ලස් කොමිසම සඳහන් කරයි.

අත්අඩංගුවට ගත් සැකකරු වලපනේ මහේස්ත්‍රාත් අධිකරණය වෙත ඉදිරිපත් කිරීමෙන් අනතුරුව මේ මස.18 දින දක්වා රක්ෂිත බන්ධනාගාරගත කළ බවද අල්ලස් හෝ දූෂණ චෝදනා විමර්ශන කොමිෂන් සභාවේ මාධ්‍ය ඒකකය සඳහන් කරයි.