රාජ්‍ය සේවක වැටුප් වැඩිකිරීමට 2026ට රු.කෝටි 11,000ක්

රාජ්‍ය සේවය ශක්තිමත් කිරීම සඳහා පසුගිය අයවැයෙන් යෝජිත වැටුප් වැඩිවීම ඉදිරියට ගෙන යමින් ලබන වසරේ වැටුප් වැඩි කිරීම සඳහා රුපියල් කෝටි 11,000ක් වෙන් කරන බවත් 2027 වසර සඳහා රාජ්‍ය සේවක වැටුප් වැඩි කිරීම සඳහා රුපියල් කෝටි 11,000ක් වෙන් කිරීමට ආණ්ඩුව සැලසුම් කර ඇති බවත්  ජනාධිපති අනුර කුමාර දිසානායක මහතා  සඳහන් කළේය.

 

ආකර්ෂණීය රාජ්‍ය සේවාවක් නිර්මාණය කිරීමට දේශපාලන අධිකාරිය ලෙස ආණ්ඩුව කැප වී සිටින බවත්, ඊට රාජ්‍ය පරිපාලන නිලධාරීන්ගේ කැපවීම අපේක්ෂා කරන බවත් ජනාධිපතිවරයා සඳහන් කළේය.

 

රාජ්‍ය සේවයේ සුළුතරයක් අතින් තමන්ට පැවරී ඇති වගකීම ගනුදෙනුවක් බවට පත් වී ඇති බවත් එසේ සමාජ වටිනාකමෙන් ඔබ්බට ගිය මූල්‍ය වටිනාකම්වලට මුල් තැන දුන් රාජ්‍ය සේවය එම තත්ත්වයෙන් මුදවාගත යුතු බවත් ජනාධිපති අනුර කුමාර දිසානායක මහතා සඳහන් කළේය.

 

රාජ්‍ය නිලධාරීන්ට පුරවැසියා කෙරෙහි ඇති වගකීම චක්‍රලේඛයකින් හෝ අණපනත්වලින් බැඳ තැබිය නොහැකි බවත්  සමාජ වටිනාකම් හා සමාජ හර පද්ධතීන්වලට මුල් තැන දෙන නිලධාරීන් බිහි විය යුතු බවත් පැවසූ ජනාධිපතිවරයා තමන්ට ලැබී තිබෙන වගකීම අනෙකා තළා පෙළා දැමීමට නොව යහපත් රාජ්‍ය සේවයක් ගොඩනඟමින්, ජනතාවට ඉතා උසස් ජීවිතයක් ලබා දීම වෙනුවෙන් යෙදවීම රාජ්‍ය නිලධාරීන්ගේ වගකීම බවත් එහිදී පෙන්වා දුන්නේය.

 

රාජ්‍ය සේවය අද සන්ධිස්ථානයකට පැමිණ ඇති බවත් තවදුරටත් කාලය ගත කරමින් ඉදිරියට යා හැකි බවත්, එසේ නොමැති නම් අපගේ කාර්යභාරය පිළිබඳ ස්වයංඇගැයීමකට ලක් කර පුරවැසියාගේ අවශ්‍යතාව මත කාර්යක්ෂම සේවාවක් ඉටු කිරීමට අවශ්‍ය මාර්ගය තෝරා ගැනීමට කාලය එළඹ ඇති බවත් ජනාධිපති අනුර කුමාර දිසානායක මහතා සඳහන් කළේය.

 

නව පරිවර්තනීය වෙනසකට අවශ්‍ය පරිදි නව අත්හදා බැලීම් සිදු කරමින් පුරවැසියාට අවශ්‍ය රට නිර්මාණය කිරීමට කටයුතු කළ යුතු බවත් නටබුන් වූ  රාජ්‍යය දේහය ප්‍රතිෂ්ඨාපනය කිරීමට කටයුතු කළ යුතු බවත් ජනාධිපතිවරයා පැවසීය.