මෝල් ගස් පහර කෑ දියණියගේ පෙම්වතා ජීවිතක්ෂයට

රිදීමාලියද්ද ප්‍රදේශයේ නිවසකට අද (11) අලුයම බලහත්කාරයෙන් ඇතුළු වී  නිවෙස් හිමියා සමඟ ඇති කරගත් බව කියන ආරවුලකින් පුද්ගලයකු  මෝල්ගස් පහර කෑමට ලක්වී එම නිවස තුළදීම ජීවිතක්ෂයට පත් වී ඇති බව රිදී මාලියද්ද පොලිසිය පැවසීය. 

මෙසේ  ජීවිතක්ෂයට පත් වී ඇත්තේ රාජපක්ෂ  මුදියන්සේලාගේ  නිපුන් සංජුල නැමැති විසි අට හැවිරිදි පුද්ගලයෙකි. 

 ඔහු පෙතියාගොඩ රිදී මාලියද්ද ලිපිනයේ පදිංචි වී සිටි අයකු බවද පොලිසිය කියයි.

 අංශභාග රෝගී තත්ත්වයෙන් පසුවන බිරිඳ සමඟ අඹු සැමි යුවලක් පමණක් එම නිවසේ එම අවස්ථාවේ  සිට ඇති අතර මරණකරු පොල්ලක් ද රැගෙන  විත්  නිවසේ දොර කඩා බලහත්කාරයෙන්  ඇතුල්වී ඇති බවද පොලිසිය කියයි. 

මරණකරු මුලින්ම තමාට පොල්ලකින්  පහර දුන්  බවද ගේ හිමියා පොලිසියට පවසා ඇත. 

 සැකකරු නිවස තුළදීම පොලීසියට භාර වීමෙන් පසුව  අත්අඩංගුවට ගෙන ඇති අතර ඔහු සමෘද්ධි සංවර්ධන නිලධාරියකු බවද පොලිසිය කියයි.

 ආරවුලට හේතු වී ඇත්තේ මරණකරු නිවෙස් හිමියාගේ දියණිය  සමඟ ඇති කරගෙන තිබෙන ප්‍රේම සම්බන්ධතාවයක් බවටද තොරතුරු අනාවරණය වන බව පොලිසිය කියයි.

මේ  සම්බන්ධයෙන් මහේස්ත්‍රාත් මරණ පරීක්ෂණයක් පැවැත්වීමට නියමිතව තිබේ.  රිදී මාලියද්ද පොලිසිය වැඩිදුර  විමර්ශන කටයුතු සිදු කරයි.