මහවිලච්චිය ගොවීන්ගේ වට්ටක්කා අස්වැන්න රජයේ ඉල්ලීමකට කාගීල්ස් මිලට ගනියි

නිසි මිලක් නොමැතිකම හේතුවෙන් තම අස්වැන්න  විකුණා ගැනීමට නොහැකිව සිටි  මහවිලච්චිය ප්‍රාදේශීය ලේකම් කොට්ඨාසයේ වට්ටක්කා  ගොවීන්ගේ  එම අස්වැන්න අතර මැදියන්ගෙන් තොරව, සෘජුවම සාධාරණ මිලකට මිලදී ගැනීමේ වැඩ සටහනක් අද (5දා)  කාගිල්ස් ආයතනය මගින් මහවිලච්චියේදී සිදු කෙරිණි. 

අස්වැන්න නෙලන තෙක්  වගාව සඳහා වැය වූ මුදල් හෝ , කිසිඳු ආදායමක් නොලැබුණු තමන්ට  මෙය ඉමහත්  සහනයක් වූ බව එම ගොවීහු පැවසූහ.

අස්වැන්න විකුණා ගැනීමට නොහැකි වීම හේතුවෙන්  අනුරාධපුර මහවිලච්චිය ප්‍රාදේශීය ලේකම් කොට්ඨාසයේ වට්ටක්කා වගා කරන ගොවීන් දැඩි ආර්ථික අර්බුදයකට මුහුණ දී සිටියහ. තමන්ගේ අස්වැන්නට සාධාරණ මිලක් නොලැබීම හේතුවෙන් බොහෝ දෙනෙකු අස්වැන්න නෙලීම නතර කළ අතර ඒ හේතුවෙන්  වගා කළ වට්ටක්කා වගා භූමියේම කුණු වී ඇති  ආකාරයද දැක ගත හැකි විය. සමහර අවස්ථාවල ගම් වදින වනඅලින්  විසින් වට්ටක්කා වගාව විනාස කර තිබෙන අයුරුද දැක ගත හැකි විය. 

එම ගොවීන්ගේ  වට්ටක්කා කිලෝවක් වෙළඳුන් විසින්  රුපියල් 20 සිට 25 දක්වා මිලදී ගත් අතර එම වට්ටක්කා දඹුල්ල ආර්ථික මධ්‍යස්ථානයේදී රුපියල් 40 සිට 50 දක්වා අලෙවි වේ. නමුත් අස්වැන්න දඹුල්ල  ආර්ථික මධ්‍යස්ථානයට රැගෙන යාම සඳහා පමණක් ලොරි කුලිය ලෙස රුපියල් 35,000ක් වැය වූ අතර  එවැනි වියදම් ගොවීන්ට දරා ගැනීම අපහසුය.

පසුගිය වසරේ  වට්ටක්කා කිලෝවක්  රුපියල් 100කට විකුණා ඇති බවත්, මෙම වසරේ කිසිඳු ආදායමක් නොලැබී ඇති බවත් ගොවීහු සඳහන් කරති. මේ වසරේදී තම වට්ටක්කා අස්වැන්න කුණු  කොල්ලයට වත් විකුණා ගත නොහැකි බව පෙන්වා දුන් එම ගොවියන් වට්ටක්කා ඇට 'ටින්' එකක් රුපියල් 10,000ක් වන අතර පොහොර මිටියක් සදහාද එවැනිම  මුදලක් වැය වන බව ඔවුහු  සඳහන් කළහ. වියදම් දරාගෙන වගා කළත් අස්වැන්නට සුදුසු මිලක් නොලැබීමෙන් තමන්ගේ මුළු  ජීවිතයම අඳුරු වී ඇති බවද සඳහන් කළහ.

වර්තමාන  වෙළඳපොළේ වට්ටක්කා කිලෝවක් රුපියල් 150 සිට 200 දක්වා අලෙවි වන නමුත් එහි ප්‍රතිලාභය ගොවීන්ට නොලැබී අතරමැදියන් විසින් එම වාසිය ලබා ගන්නා  බවද එම පිරිස් අනාවරණය කළහ.

මහවිලච්චිය ප්‍රදේශයේ වට්ටක්කා වලට නිසි මිලක් නොමැතිව අසරණ වී සිටි ගොවීන්ගේ වට්ටක්කා මිලදී ගැනීම සඳහා කාගීල්ස් ආයතනයේ නිලධාරීන් ප්‍රදේශයට පැමිණ ගොවීන්ගේ අස්වැන්න සෘජුවම, අතරමැදියන්ගෙන් තොරව, සාධාරණ මිලකට මිලදී ගැනීම සම්බන්ධයෙන් එම ගොවීහු දැඩි ප්‍රසාදය පළ කළහ.  මෙලෙස මිලදී ගන්නා වට්ටක්කා දිවයින පුරා පිහිටි කාගීල්ස් ෆුඩ් සිටි 546කට බෙදා හැරීමට නියමිතය.

මෙම වැඩසටහන ක්‍රියාත්මක වන්නේ රජය විසින් කරන ලද ඉල්ලීමකට අනුව, තඹුත්තේගම කාගීල්ස් අස්වනු එකතු කිරීමේ මධ්‍යස්ථානයේ සම්බන්ධීකරණයෙන්ය. ගොවීන්ගේ අස්වැන්න සෘජුවම මිලදී ගන්නා මෙවැනි ක්‍රියාමාර්ගයකින් නැවුම් වට්ටක්කා අඩුම මිලට පාරිභෝගිකයින්ට ලබා ගැනීමටද අවස්ථාවක් උදා වී ඇත.

මෙවැනි අවස්ථාවකදී තමන්ගේ අස්වැන්න සාධාරණ මිලකට මිලදී ගත් කාගීල්ස් ආයතනයට මහවිලච්චිය ගොවීහු  ස්තූතිය පුද කළ අතර  වෙළඳපොළේ පවතින අසාධාරණය මැද ඔවුන්ට ජීවිතය දිගටම ගෙන යාමට උපකාරී වූ මෙම මැදිහත්වීම ඔවුන්ට සැබෑවටම සහනයක් බවද  ගොවීහු සඳහන් කළහ.