මහනුවර - මහියංගණය මාර්ගය වසා දැමේ

දිවයින පුරා පවතින අයහපත් කාලගුණය හේතුවෙන් මහනුවර මහියංගණය මාර්ගය  මැදමහනුවර සිට හසලක දක්වා කොටස හෙට (28) උදෑසන 07.00 තෙක් වසා දැමීමට මහනුවර දිස්ත්‍රික් ආපදා කළමනාකරණ කමිටුව තීරණය  කළ බව මහනුවර දිස්ත්‍රික් ලේකම් ඉන්දික උඩවත්ත මහතා  ප්‍රකාශ කරයි.

එම මාර්ග කොටස තුළ දැඩි ආපදා තත්වයක් ඇති වීම සහ විටින් විට සිදුවන පස් සහ ගල් පෙරළීම් හේතුවෙන් මෙම තීරණය ගත් බව මහනුවර දිස්ත්‍රික් ලේකම් ඉන්දික උඩවත්ත මහතා තව දුරටත් සඳහන් කරයි.

මහනුවර දිස්ත්‍රික්කයේ උඩුදුම්බර ප්‍රාදේශීය ලේකම් කොට්ඨාශය තුළ වැඩිම හානි සිදුවී ඇති බවත් මහවෙල ග්‍රාම නිලධාරී වසමේ මරණ දෙකක් සහ ගංගොඩ ග්‍රාම නිලධාරී වසමේ මරණ තුනක් මේ වන විට වාර්තා වී ඇතැයි දිස්ත්‍රික් ලේකම්වරයා සඳහන් කළේය.

මේ වන විට අවතැන් කඳවුරු හතක පවුල් සියයක පමණ ප්‍රමාණයක් රැදවීමට පියවර ගෙන ඇති බවත් අතුරුදහන් වුවත් මුදා ගැනීමේ කටයුතු සඳහා ශ්‍රී ලංකා යුද හමුදාව, පොලිසිය සහ ගම්වාසින් එක්ව මේවන විටත් යුහුසුළුව කටයුතු කරන බව දිස්ත්‍රික් ලේකම්වරයා කීය.

ජනාධිපති අනුර කුමාර දිසානායක මහතාගේ මැදිහත්වීම මත මහනුවර දිස්ත්‍රික්කයේ අමාත්‍යවරුන් සහ පාර්ලිමේන්තු මන්ත්‍රීවරුන්ගේ අනුමැතියෙන් මහනුවර දිස්ත්‍රික්කයේ ආපදා කළමනාකරණය සඳහා අවශ්‍ය සියලු ප්‍රතිපාදන මේ වන විටත් මුදාහැර ඇතැයි දිස්ත්‍රික් ලේකම් ඉන්දික උඩවත්ත මහතා තවදුරටත් සඳහන් කළේය.

මොහොමඩ් ආශික්